Биыл 3 қарашада электромобиль жасайтын XPeng компаниясының XPeng Aeroht атты бөлімшесі сынақ режимінде ұшатын автомобиль өндіре бастады. Синьхуа хабарлағандай, 120 мың шаршы метр аумақты алып жатқан зауыт оңтүстік Қытайдағы Гуандун провинциясының әкімшілік орталығы Гуанчжоу қаласының Хуанпу ауданында орналасқан.
Кәсіпорын алғашқы ұшатын аппаратын шығарды. Бастапқы кезеңде зауыт жылына 5 мың модуль жинайды, кейін көрсеткішті 10 мыңға дейін арттыруды жоспарлап отыр. Демек конвейерден жарты сағат сайын бір гексакоптер түсіп отырады. Компания қазірдің өзінде 5 мыңға жуық тапсырыс түскенін, жаппай өндіріс пен жеткізуді 2026 жылға жоспарлағанын хабарлады.
Қытайдағы өндірушілер әзірге толыққанды ұшатын автомобиль жасаған жоқ. Инженерлердің Land Aircraft Carrier (LAC) деп аталатын жобасы алты дөңгелекті гибрид вэн мен пикаптың қосындысы саналатын негізгі көлік және тік ұшып-қонатын электрлі аппараттан (eVTOL) құралған. eVTOL модулінің автоматты және қолмен басқарылатын екі режимі бар. Автоматты режимде бағытты жоспарлап, бір түймені басу арқылы ұшуға және қонуға болады.
LAC дизайны Tesla Cybertruck-қа ұқсайды, бірақ мамандар Илон Масктың жобасынан шабыт алмағандарын айтты. Машинаның ұзындығы шамамен 5.5 метр, ені — 2 метр, биіктігі — 2 метр. Мұндай көлікті жүргізуші куәлігімен жалпы жолда тізгіндеп, қарапайым тұраққа қоя аласыз. Салонында 4 орын бар, ұшатын модульге 2 адам отырады.
LAC — кішкентай іштен жанатын қозғалтқышы бар тізбекті гибрид. Ол шамамен 1000 шақырымды еңсереді.
Ұшатын аппарат жүксалғышта орналасқан. Оны негізгі көліктен ажырату үшін бір батырманы басу жеткілікті, бұл процеске бес минуттай уақыт кетеді. Модуль 300–500 метр биіктікте 5–6 рет ұша алады, ең жоғары жылдамдығы — 360 км/сағ. Батареяны 30-дан 80 %-ға дейін қуаттау үшін 18 минут қажет. Бірақ ұшу ұзақтығы белгісіз. Компания өкілдері иесі «көрікті жерлерге барып, көлігін тұраққа қойып, жүксалғыштан дронды шығарып, ұша алады» деп мәлімдеді.
Алдын ала мәлімет бойынша модульді ұшатын көліктің бағасы 1–2 миллион юань (138–276 мың доллар) болады.
Комментариев: 0