Қытайда Xiaomi SU7-нің кішкентай көшірмесі пайда болды

Қытайда Xiaomi SU7-нің көшірмесі көзге түсті. Шағын кросс-хэтчтің алдыңғы бөлігі танымал модельге ұқсайды. Көліктің суреттерін CarNewsChina жариялады. Әлеуметтік желіде жұрт Yunlei жасаған бұл машинаны Xiaomi смартфондарының Redmi сериясымен салыстырып, Redmi SU7 деген атау берді.

Автомобильдің алдыңғы бөлігі ғана емес, жарық техникасы мен бампері де түпнұсқасына ұқсайды. Өндіруші Xiaomi-дің Blue Bay атты фирмалық түсін де дәл қайталаған.

Shandong Yanlu New Energy компаниясына кіретін Yunlei брендінің Шаньдун провинциясында зауыты бар. Ресми сайтта компания Оңтүстік Азиядағы тук-тукке ұқсайтын электрлі трицикл өндірісімен айналысады деп жазылған. Сайтта SU7 көшірмесі туралы ақпарат табылмады, бірақ ішкі классификация бойынша бұл бес есікті автомобиль қуаты аз мотормен жүретін арзан шағын электрокарға (LSEV) жатады деген болжам бар. Олар қысқа сапарға арналған, техникалық сипаттамасы өте қарапайым екенін ескерсек, оны кез келген адам басқара алады.

Күз басында интернетте дизайны Rolls-Royce Phantom мен Mercedes-Maybach GLS модельдеріне ұқсайтын микрокарлардың суреті тараған еді. Мына туынды да сол қатарда сияқты.