Компания жақында Қытай нарығына арналған электромобиль бағасын түсірді. Model 3 пен Model Y бірден 25 %-ға арзандаған. Жергілікті БАҚ осыдан кейін кей қалада электрокарға сұраныс алты есе өскенін хабарлады.
Баға төмендегеннен кейінгі алғашқы демалыс күндері Tesla салондары 110–130 тапсырыс алды. Бұл соның алдындағы демалыс күндерімен салыстырғанда 450–500 %-ға артық. Баға түскеннен бері Қытайда 30 мыңға жуық жаңа Tesla өтті.
Tesla көліктері арзандағаннан бері электромобильді иесіне жеткізу уақыты бір аптаға ұзарған, бұл да марка өнімдеріне сұраныс артқанының бір дәлелі.
Осыдан кейін жергілікті өндірушілер де машинасын арзандата бастады. Мысалы, Seres пен Huawei құрған Aito стартапы екі моделін де 4.4 мың долларға арзандатты. Xpeng компаниясы барлық моделінің бағасы 12 %-ға төмендегенін жариялады. Бірақ бұған Tesla саясатының қатысы жоқ екенін, баға өндіріс шығыны азайғандықтан түскенін хабарлады.
Өзге маркалар да осы осындай қадамға баруы мүмкін. Қытай билігі электромобиль сатып алғанда берілетін субсидияны біртіндеп тоқтатып жатыр, бұл сатып алушының қалтасына түсетін салмақты арттырады. Жергілікті БАҚ автоөндірушілер арасында «баға соғысы» басталғанын айтады.
Қытайда баға түспей тұрып Tesla сатып алған тұрғындар марка өнімдері бірден арзандағанда бұған наразылық білдірген. Кей қалада жағдай ушығып, бір Tesla автосалоны бүлінді.
Комментариев: 0