Қытайда қоқыста жатқан Hongqi лимузиндері табылды

Әлеуметтік желіде қараусыз қалып, шіріп жатқан бірнеше Hongqi түскен видео жарияланды. «Китайские автомобили» басылымы бұл 2010 жылдары билік өкілдері мінген L5 лимузиндері деп жазды. Сол кезде бағасы 5-6 млн юань (шамамен 350-400 млн теңге) болған екен.

Марка L5 седанының алғашқы буынын 2013 жылы таныстырды. Ұзындығы — 5.5 метр, дөңгелек базасы 3.4 метр автомобиль 408 ат күшіне ие 6 литрлік 12 цилиндрлі мотормен жүрді. Кейбір мәлімет бойынша компания 500 машина шығарып, еркін саудалаған.

Видео авторы роликті Hongqi зауытының маңында түсіргенін жазыпты, қоқыста жатқан серия алды прототиптер екен. Оларды компания аса сәнді моделін тестілеу үшін қолданып, сынақ мерзімі аяқталған соң қараусыз қалдырған. Блогердің сөзін кейбір көліктің камуфляжбен қаптаулы тұрғаны растайды.

Машиналардың мұнда тұрғанына он жылдан асқан сияқты. Сол аралықта лимузиндер әйнегі мен оптикасынан айырылып, дөңгелегінің желі шыққан, салоны да бүлініпті, шанағын тот басқан. Лимузиндердің кейінгі тағдыры белгісіз, бірақ ерте ме, кеш пе, темір өткізетін жерге кететін шығар.