Қытай жеңіл автомобиль қауымдастығы қаңтар мен қыркүйек аралығында елде көліктердің қалай арзандағанын есептеді. Нәтижесінде бағаның төмендеу қарқыны алдыңғы жылдармен салыстырғанда едәуір жоғары екені анықталды. Осыған байланысты сауда өсіп жатыр, бірақ дилерлер риза емес, себебі мұндай саясат оларға шығын әкелуде.
Биыл 9 айда Қытайда 195 модельдің бағасы төмендеді. Былтырмен салыстырғанда бұл көп, ол кезде бар болғаны 150 модель арзандаған, ал 2022 жылы тек 95 көліктің бағасы өзгерген еді.
Негізі электромобиль мен гибридтің бағасы төмендеді, бірақ кейбір сұйық отын тұтынатын модель де арзандады. Орта есеппен 69 батареялы көліктің бағасы 23 мың юаньға (шамамен 1.5 млн теңге) төмендесе, 29 қуатталатын гибридтің бағасы 24 мың юаньға (1.6 млн теңге) түсті, ал тізбекті гибрид жүйесі бар 13 модель 14 мың юаньға (шамамен 960 мың теңге) төмендеген. Бензинмен жүретін көліктердің бағасы орта есеппен 15 мың юаньға (шамамен 1 млн теңге) түсті.
Өндірушілер бірінші жарты жылдықта бағаны белсенді түрде өзгертті, ал қыркүйекке таман Қытай нарығындағы баға соғысы бәсеңдей бастады. Дегенмен сала сарапшылары Қытай Жаңа жылы қарсаңында тұтынушы үшін күрес қосымша жеңілдік ұсыну арқылы жалғасады деп болжайды.
Сатушылар мұндай өндіруші саясаты оларға тиімсіз екенін айтуда. Cnevpost басылымының Қытай Автомобиль дилерлері қауымдастығының есептеріне сілтеме жасап хабарлауынша, қаңтар мен тамыз аралығында ритейлерлердің жалпы шығыны 138 млрд юаньды немесе 19.5 млрд доллардан астам соманы құраған.
Комментариев: 0