Қытайда Chevrolet Equinox жаңарады. Қазақстанға келе ме?

Жаңа Chevrolet Equinox туралы мәлімет Қытай Өнеркәсіп министрлігінің сертификат базасында шықты. Мекеме жариялаған фотосуреттен кроссовердің сырт пішіні әдәуір өзгеріп, көлемі сәл үлкейгенін байқауға болады. Жергілікті нарыққа арналған модельдің негізгі моторы өзгерген жоқ, бірақ қуаты артты. Машина биыл сатылымға шығады.

Equinox қайта жасалған алдыңғы жағы және қырлы сұлбасының арқасында агрессивті көрінеді. Алдыңғы бөлігі жаңа радиатор торы, басқа бампер және екі деңгейлі оптикамен ерекшеленеді.

Кроссовердің төбесі бұрынғыдан жалпақ болады, артқы тірек пен терезе астындағы сызық өзгерді. Соның арқасында жүксалғыш көлемі артты. Арт жағындағы спойлер өзгерісіз қалды, ал шамы L пішінді болды. Дөңгелек дискісі — 19 дюймге дейін.

Кроссовер өлшемі — 4653×1902×1710 мм, дөңгелек базасы — 2730 мм. Машина Қазақстанда бұған дейін сатылған Equinox-тан ұзындау, ось арасындағы қашықтық 5 мм артты. Құжатта кроссовердің базалық нұсқасы 1.5 литрлік турбомоторын сақтап қалатыны жазылған, бірақ қуаты 169-дан 173 ат күшіне артады.

Қытайдағы Equinox Қазақстандағы нұсқасы сияқты 238 ат күшіне ие (350 Нм) 2 литрлік турботөрттікпен жүреді. Жаңа модельдің қозғалтқышы туралы мәлімет жоқ. Кроссовер Қытайда ғана жаңара ма, белгісіз, бірақ Chevrolet Equinox-ты әлем бойынша жаңартады деген ақпарат бар.

Қытайда 2 литрлік мотормен жүретін Equinox-тың бағасы 219 900 юаньнан (14 млн теңге) басталады, ал Қазақстанда кроссовер бұдан 3.3 млн теңге қымбат.