Қытайда алғаш рет бір айда миллионнан астам электрокар мен гибрид саудаланды

Тамызда NEV (электрокар мен қуатталатын гибрид) категориясындағы 1.03 миллион автомобиль өз иесін тапты деп хабарлады Reuters. Қытай бұл нәтижеге қол жеткізген әлемдегі алғашқы ел болды. Алайда нарықтағы сауда бесінші ай қатарынан төмендеп келеді.

Аспан асты елінде тамызда 1.92 миллион автомобиль сатылды. Жаңа энергиямен (NEV, New Energy Vehicles) жұмыс істейтін көлік жалпы сауданың 53.5 %-ын (басқа деректер бойынша 53.9 %) құрады, бұны да өзіндік рекорд деуге болады. Шілдеде сауда 3 % төмендегеннен кейін, көрсеткіш былтырғы тамызбен салыстырғанда 1.1 % азайған.

BYD концерні Қытай нарығындағы NEV сегментінің көшбасшысы атанды. Бренд танымалдық жағынан алғашқы алты орынды иеленді, ал топ-20 тізімге 12 моделі кірді. Tesla-ның Қытайдағы бөлімшесі үшін тамыз ең табысты ай болды.

Агенттік Қытайдағы NEV танымалдығы мемлекеттік субсидияның арқасында артты деп мәлімдеді. Мысалы, дәстүрлі мотормен жүретін көліктен электрокарға ауысқандар 20 мың юань жеңілдік алуға құқылы, көлемі аз іштен жанатын қозғалтқышы бар модельге ауысқанда 15 мың юань алады. Субсидияға үміткердің 80 %-дан астамы батареялы көлік таңдаған.

Еуропа халқы керісінше, электрокардың болашағына күмәнмен қарай бастады. Сарапшылар мұны «жасыл» көлік алуға арналған мемлекеттік субсидияның аяқталуымен, сондай-ақ ЕО-ның Қытай электромобиліне қатысты кедендік салық саясатымен байланыстырады.