Қытай тұрғындары Tesla салондарына шабуыл жасады

Tesla алған бірнеше тұрғын Қытайдағы Чэнду қаласында орналасқан сату орталықтарына басып кірді. Жергілікті БАҚ таратқан ақпаратқа сенсек, олар көлік сататын орындарды қиратып тастаған. Кейбір басылымдар мұны вандализм десе, біразы тұтынушыларды қорғау актісі деп жазды.

Tesla қаңтар кіре салысымен жергілікті нарыққа арналған өнімдерінің бағасын түсірді. Model 3 пен Model Y комплектациясына байланысты 2.8-6.75 мың долларға арзандаған. Бұл соның алдында ғана электромобиль алған тұрғындардың шамына тиді. Көп жерде көлік иелері митинг ұйымдастырып, бейбіт тараған, ал Чэнду қаласында жағдай ушығып, марканың сату орталықтары бүлінді.

Автосалон басшылары наразы топ салонды қиратып, біраз жабдықты алып кеткенін және жұртқа көрсету үшін қойған Cyberquad квадроциклын зақымдағанын хабарлады. Ашуға мінген Tesla иелері оқиға орнында петиция жазып, компаниядан артық төлеген ақшасын қайтаруды талап еткен.

Талаптар тізімінде электрокарды 100 шақырымға дейін тегін қуаттау, опция түріндегі бірнеше функцияны қолдануға мүмкіндік беру және әлдеқайда ауқымды кепілдік бар.

Топ-менеджерлердің бірі ешқандай өтемақы төленбейтінін кесіп айтты. Бұл жағдайға құқық қорғау органдары назар аудара ма, жоқ па, әзірше белгісіз. Ал Tesla болса, көліктеріне сұраныс төмендеп бара жатқандықтан электрокар бағасын біртіндеп түсіріп жатыр. Есеп жүргізгендер күзде Model 3 пен Model Y аспан асты елінде шамамен 25 % арзандағанын айтады.