Tank маркасының Ресейдегі өкілдері 300 және 500 модельдерінің елдегі жолдар мен суық ауада өзін қалай ұстайтынын анықтағанын хабарлады. Екі көлік те сынақтан сүрінбей өтіпті. Сату процесі қашан басталатыны белгісіз, бірақ тұрғындар 2023 жылдың бірінші тоқсанында ала алады деген болжам бар.
Машиналар қанша шақырым жол жүргенін бренд басшылары нақты айтпай, мыңдаған км деді. Жолда аса күрделі, қар басқан және орманды жерлер кездескен.
Сургутта мамандар автомобильдің үскірік аязға төтеп беру қабілетін байқады. Тексеріс күштік құрылым мен борт электроникасын қамтыған. Одан бөлек қозғалтқыштың суықта іске қосылу мүмкіндігін және қатты аязда қанша жанармай жұмсайтынын бағалады.
Tank өкілдері 300 бен 500-ді жергілікті ауа райына бейімдеу үшін алдыңғы әйнекті, әйнек жуғыш бүріккішін, алдыңғы және артқы орындықтарды жылытқыш секілді опциялар орнатқанын атап өтті. Сонымен қатар артқы көрініс айнасын жуғыш болады.
Көрші ел нарығына шығатын Tank 300 8 диапазонды автоматпен жұмыс істейтін 2 литрлік мотормен (220 а. к.; 387 Нм) жүреді. Одан ірілеу Tank 500 3 литрлік қозғалтқышпен сатылады. 9 сатылы қораппен жұптасқан агрегат 299 ат күшіне (500 Нм) ие. Екеуі де толық жетек жүйесімен және көмекші жүйелермен жабдықталады.
Комментариев: 0