Қысқы дизель бағасы 570 теңгеге жетті

22 қарашада елдегі көптеген жанармай құю бекеті қысқы отынның литрін 569-570 теңгеден сатты. Бағаны 500 теңге мөлшерінде ұстап тұрған бекеттер де бар, бірақ олар бағаны қашанға дейін өсірмейтіні белгісіз.

Қазақстан қысқы дизельді Ресейден сатып алады. Мамандар дизельдің мұнша қымбаттауына теңгеге шаққандағы рубль бағамының өсуі себеп болды дейді. Бір жыл бұрын бір рубль 5-6 теңге болса, биыл жазда 9 теңгеге жетті, ал қазір 7.5 теңге болып тұр. Дизель құнының өсуіне әсер еткен тағы бір жағдай — Ресей 10 қарашада ЕЭО елдеріне зауыттан жанармай экспорттауға тыйым салды.

Бұған дейін дизельді ЕЭО елдеріне акциз бен қосымша құн салығын төлемей жеткізуге болатын, соның арқасында отынның өзіндік құны айтарлықтай төмендейтін. Енді біздің елге жанармай барлық алым толық төленетін мұнай базаларынан келеді. Акциз бен ҚҚС қосылғандықтан баға да өсіп кетті. Нәтижесінде елде отын күрт қымбаттады.

Ресей мұнай өңдеу зауыттарынан тікелей экспорт жасауға 2023 жылғы 1 қаңтарға дейін тыйым салып отыр, бірақ бұл мерзім тағы ұзартылуы мүмкін.

Айта кетерлігі, Ресейден Қазақстанға бензин мен дизель жеткізу туралы келер жылға арналған келісімшарттың тағдыры бұлыңғыр. Баға қандай болатыны әлі белгісіз. Оның үстіне 2023 жылы елдегі үш мұнай өңдеу зауыты кезекпен күрделі жөндеуден өтеді. Демек елде дизель ғана емес, бензин де тапшы болуы мүмкін.