Зерттеуге 2013 жылы шығарылған көліктердің 2018 жылғы нарықтық бағасы қолданылған, — деп хабарлайды ҚАБА.
Су жаңа автокөліктің дилерлік орталықтан шыға салысымен-ақ, әр жүрген шақырым сайын арзандай беретіні жасырын емес. Бағаның төмендеуі темір тұлпардың санатына, өтімділігіне, техникалық жағдайы мен тауарлық түріне де байланысты болатыны анық. Әдетте құнын ең көп жоғалтатын қымбат көліктер: F-классты седандар, аса көлемді моторға ие үлкен жол талғамайтын көліктер. Ал құнын ең аз жоғалтатын В-классты бюджеттік седандар мен кроссоверлер.
Алайда валюта бағамының жиі құбылуына байланысты (ол кезде де, қазір де көліктер тек ұлттық валютада сатылады) бес жыл бұрын сатылған автокөліктер бағасын сақтап қалды десе болады, тіпті олардың кейбірі алғашқы бағасынан әлдеқайда қымбат сомаға өтуде. Зерттеу аясында 2013 жылы ең көп сатылған 20 көліктің қалдық құны есепке алынды.
| 2013 жылғы үздік 20 көлік | 2013 жылғы жаңа көліктің бағасы | 2013 жылғы көліктің 2018 жылдағы құны | Бағадағы өзгеріс |
| Lada Priora | ₸1 795 237 | ₸1 622 500 | -9.6% |
| Lada Samara | ₸1 323 607 | ₸1 289 500 | -2.6% |
| Daewoo Nexia | ₸1 416 987 | ₸1 405 000 | -0.8% |
| Lada Granta | ₸1 673 526 | ₸1 595 500 | -4.7% |
| Lada 4×4 | ₸1 597 457 | ₸1 676 500 | 4.9% |
| Hyundai Accent | ₸2 817 356 | ₸3 273 700 | 16.2% |
| KIA Rio | ₸2 813 999 | ₸3 267 000 | 16.1% |
| Chevrolet Cruze | ₸3 184 941 | ₸3 066 000 | -3.7% |
| Toyota Camry | ₸6 263 701 | ₸6 770 000 | 8.1% |
| Renault Duster | ₸3 104 987 | ₸3 600 000 | 16.0% |
| Nissan Qashqai | ₸4 521 175 | ₸4 642 500 | 2.7% |
| Daewoo Matiz | ₸1 168 618 | ₸1 228 500 | 5.1% |
| ZAZ Chance | ₸1 840 352 | ₸1 271 000 | -31.0% |
| Chevrolet Niva | ₸2 510 289 | ₸2 391 500 | -4.7% |
| KIA Cerato | ₸3 723 904 | ₸3 910 500 | 4.9% |
| Toyota LC Prado | ₸9 843 245 | ₸11 817 500 | 20.3% |
| Toyota LC200 | ₸14 874 121 | ₸16 454 500 | 10.7% |
| Volkswagen Polo | ₸2 923 512 | ₸3 038 500 | 4.0% |
| Nissan Juke | ₸4 036 289 | ₸4 524 000 | 12.1% |
| SsangYong Kyron | ₸4 013 997 | ₸4 101 000 | 2.3% |
Үздіктердің көшін платформалы Hyundai Accent/Kia Rio бастап тұр, седандар мен хэтчбектер құнын жоғалтпағанымен қоймай, тіпті қымбаттай түскен. Егер 2013 жылы Accent үшін шамамен 2.82 млн қаржы жұмсалса, бес жылдан кейін бұл көліктер 3.27 млн теңгеге (+16,2 %) бағалануда.
Сонымен қатар, бес жылда Toyota көліктері де аз құн жоғалтқан. Жапониялық темір тұлпарлар қалдық құны бойынша барлық класста да көш басында келеді. Үздік жиырмалық тізіміне Toyota Camry 50, Land Cruiser Prado 150 және Land Cruiser 200 үлгілері енген. 2013 жылы Camry шамамен 6.26 млн теңгеге сатылатын болса, өткен жылы дәл осы көлік үшін сатушылар 6.77 млн теңге (+8.1 %) сұраған. Land Cruiser 200 қозғалтқыш көлемінің үлкендігі мен салық сомасының жоғары болғанына қарамастан, бағасы 10.7 %-ға өскен. (2013 жылы жол талғамайтын көліктің бағасы 14.87 млн теңгені құраса, 2018 жылы 16.45 млн теңгеге сатылған). Бұл тізімдегі рекордтық көрсеткішке ие үлгі — Prado. Себебі аталған үлгідегі бес жасар көліктер орта есеппен 2 мииллионға қымбаттап, бағасы 11.81 млн теңгеге (+20.3 %) жетіпті.
ҚАБА атап өткендей, өндірушілер үлгісін жиі әрі түбегейлі өзгерте бермейтін автокөліктер құнын аз жоғалтып, бірнеше жыл ішінде көбірек қымбаттайды екен.
Комментариев: 0