Қымбат көлік өндірушілер үшін 2022 жыл сәтті болды

Әлемде түрлі жағдай болып жатса да, люкс автомобиль шығаратындардың тасы өрге домалап барады. Ресми есеп бойынша 2022 жыл Rolls-Royce қана емес, Bentley, Lamborghini, тіпті Bugatti үшін де аса табысты болды.

Bentley компаниясы өз тарихында алғаш рет бір жылда 15 мың автомобиль сатқанын хабарлады. Ең көп өткен модель — Bentayga (сатылымның 42 % -ы). Ал Flying Spur седанын клиенттердің 28 %-ы ғана таңдапты.

Bentley алғандардың көбі Солтүстік Америкада тұрады, мұнда 4221 автокөлік иесін тапқан.

Lamborghini былтыр 9223 машина сатты, бұл 2021 жылмен салыстырғанда 10 % көп. Urus кроссоверінің танымалдығы 7 % (5367 дана) артып, ең көп сатылған Lamborghini атануына мүмкіндік берді. Ал Huracan былтыр 2021 жылмен салыстырғанда көбірек жұрт назарына іліккен, оның 3113 данасы өтті. Бұған Aventador-дың тарих қойнауына кетуі себеп болса керек. Флагманның ізбасарын марка алдағы бірнеше айда таныстырады.

Bugatti былтыр 80 гиперкардың кілтін иелеріне тапсырғанын мәлімдеді. Басқа маркалардың көрсеткішінен әлдеқайда аз көрінгенмен, бұл Bugatti үшін бұрын соңды болмаған жоғары нәтиже. Олардың арасында 10 Centodieci, соңғы шыққан Chiron Super Sport 300+ және 400-інші Chiron бар. Енді компанияға өзі жоспарлаған 500 гиперкардың жүзін шығару ғана қалды.

Біраз уақыт бұрын Rolls-Royce 6021 машина сатып, жеке рекорд жасағанын хабарлаған. Компания басшылары бұл бәсекелес Bentley көрсеткен нәтижеден аз болса да, премиум марканың беделі санға баса назар аудармай-ақ еңбек етуге мүмкіндік береді дейді.