«Қазақстан Республикасының аумағына кіруге және одан шығуға шектеу қойылады, бұған түсіністікпен қарауды сұраймын. Бірақ аталған шаралардың жүк тасымалына қатысы жоқ» — деді мемлекет басшысы.
ҚР индустрия және инфрақұрылымдық даму вице-министрі Берік Камалиев қазіргі уақытта азық-түлік, халық көп тұтынатын және медициналық тауарлар мен пошталық жөнелтімдерді көлікпен тасымалдауға шектеу қойылмайтынын айтты. Бірақ ел аумағына шетелден келетін жүргізушілердің шекарадан уақытша сақтайтын қоймаға дейін барып, бірден кері қайтуына ғана рұқсат беріледі.
Камалиевтің айтуынша, Қазақстанға келген тасымалдаушылар жанармай құю бекеттерінен, тамақтанатын орындар, азық-түлік дүкені мен арнайы тұрақ не жөндеу орындарынан басқа жерлерге соқпастан, жол парағында көрсетілген қоймаға тікелей жетуі тиіс.
Жуық арада санитарлық-эпидемиологиялық қызметтер кеден жұмысшыларымен және шекарашылармен бірге транзиттік көліктерді өткізетін арнайы орындарды белгілейді.
Естеріңізге сала кетейік, 16 наурызда Қазақстанда төтенше жағдай режимі енгізілді. Бірнеше ірі сауда орындары жабылып, мерекелік шаралар өткізуге тыйым салынды, сонымен қатар ел аумағына кіруге және елден шығуға шектеулер қойылды.
Комментариев: 0