QR-код арқылы көлікті қалай тіркейді

Биыл 23 сәуірде көлік құралын тіркеу және есепке қою ережесі өзгеріп, автомобильді қайта тіркеу үшін қағаз, жазбаша форма қабылдау тоқтады. Автомобильді қайта тіркеудің жаңа механизмін «Азаматтарға арналған үкімет» мамырдың ортасына дейін енгізуі қажет еді, бірақ IT процесі белгіленген мерзімде аяқталмады. Ішкі істер министрлігі қайта тіркеу функциясын өшіріп, бірнеше күн бойы арнайы ХҚКО-да нотариус куәландырған сатып алу-сату келісімшартын ғана қабылдады.

Бұған жұрт наразы болды, өйткені жүргізушілер қосымша әуреге түсумен қатар, нотариалды қызмет үшін ақша төлеуге мәжбүр болған. Нәтижесінде «Азаматтарға арналған үкімет» 10 маусымда іске қосылатыны анықталды, оған дейін автомобиль Kaspi.kz қосымшасы сияқты бұрынғы тәсілдер арқылы тіркелді.

10 маусымда көлікті қайта тіркеудің жаңа тәсілі іске қосылды. Мемлекеттік корпорацияның баспасөз қызметі хабарлағандай, енді аталған қызметті алатын азамат ХҚКО қызметкеріне жүгінген кезде жүйеге сатушы мен сатып алушы және көлік құралы туралы ақпаратты енгізеді. Содан кейін жұмыстың электронды жазбаша формасы автоматты жасалып, экранда QR-код көрінеді. Оны сканерлеу арқылы автомобильді сатып алушы мен сатушы шартпен танысып, eGovmobile қосымшасы арқылы келісімге қол қоя алады.

Мұндай процесс eGov business қосымшасы арқылы ұйымның электронды цифрлы қолтаңбасын пайдалану құқығы және сенімхаты бар заңды тұлға өкілдері үшін де қолжетімді.

Мүлде смартфоны жоқ тұрғындар жаңа қызметті пайдаланамын десе, смартфон алуы керек. Әйтпесе, құжатты нотариусқа барып куәландыруға тура келеді.

«Азаматтарға арналған үкімет» Kolesa.kz редакциясына түсіндіргендей, мобильді қосымша қолданып үйренбеген жүргізушіге ХҚКО мамандары телефонға eGov mobile орнатуға және сатып алу-сату шартын жасауға көмектеседі.