ҚР Индустрия және инфрақұрылымдық даму министрлігінің баспасөз қызметі хабарлағандай, жалпы құны 9 223.8 млн теңгені құрайтын жоба 2017 жылы басталып, қазіргі уақытта 90 %-ға аяқталды. Атап айтқанда, жер жұмыстарының 85 %-ы орындалды. «Таға» типіндегі эстакада құрылысының 78 %-ы, басты магистраль арқылы өтетін эстакада құрылысының 35 %-ы аяқталды. Сондай-ақ, Ақсай өзені арқылы өтетін көпірдегі жұмыстар 90 %-ға орындалса, жаяу жүргіншілерге арналған жерүсті өткелдерінің 30 %-ы салынды.
«Асыл Арман» тұрғын үй кешені маңындағы жолайрық құрылысы басталды. Қазіргі уақытта жол жөндеушілер ондағы желілерді қайта құру және шығару жұмыстарына дайындалып, эстакаданың екі тірегінде бұрғылау жұмыстарын жүргізуде. Жоспар бойынша, «құбыр» типіндегі әрдеңгейлі төрт жолақты жолайрық пен жаяу жүргіншілерге арналған көпір 2021 жылдың қаңтар айында қолданысқа берілуі тиіс.
Алайда ИИДМ мамандарының 90 % дегенді қайдан шығарғаны белгісіз. Жобаның әр бөлігі 35, 78 %-ға дайын екенін ескерсек, мекеме сандарды өтірік көрсеткен сияқты. Бірақ министрлік үш шақырымнан сәл асатын жолдың құрылысын 2020 жылдың соңына дейін аяқтауға сөз берді.
Естеріңізге сала кетейік, базар маңындағы төрт шақырым жолды он жолақты ету жоспарланды. Жобаға сай келесі нысандардың құрылысы қарастырылған:
- Райымбектің «Квартал КазМиС» көшесімен қиылысар тұсында «таға» типті эстакада салу;
- Абай ауылына кірер жерге эстакадасы бар кері бұрылатын айналма жол салу;
- Асыл Арман шағынауданынан шығуға арналған жерасты тоннелін салу;
- «Апорт» СО, «Алтын Орда» СО, Асыл Арман және Райымбек ауылы маңында жаяу жүргіншілерге арналған бірнеше өткел салу.
Комментариев: 0