Оқиға 5 ақпанда болған. Бұл жөнінде ішкі істер министрінің орынбасары Алексей Калайчиди баяндады. Оның айтуынша, үш адам жеңіл көлікпен келе жатады, сол сәтте жүк көлігіне мінген тағы үш адам үйден жолға шығады. Жол үстінде сөзге келіп қалған қос тарап артынша жаға жыртысқан.
Кейін Сортөбе ауылында Honda Odyssey-ге мінген ер адамдардың тәртіп сақшыларының талабына бағынбағаны жөнінде видео жарияланып, жергілікті халық арасында лезде тарап кетті. Бүлікке шақырған жазбалар тарағаннан кейін ұрыстың арты үлкен жанжалға ұласқан.
7 ақпан күні Жамбыл облысының Қордай ауданына қарасты Масанчи, Аухатты және Булан-Батыр тұрғындары арасында төбелес болды. Салдарынан бірнеше адам жарақат алып, 10 адам қаза тапты. Зардап шеккендер арасында полицейлер де бар.
Жанжалға қатысушылар ғимараттар мен көліктерге өрт қойып, нәтижесінде 30 жеке үй, 15 сауда орны мен 23 автокөлікке зақым келді.
ҚР премьер-министрінің орынбасары Бердібек Сапарбаев бастаған үкіметтік комиссия болған жағдайдың жай-жапсарын анықтап, болашақта мұндай оқиғалар қайталанбау үшін тиісті шаралар қолданбақ ниетте. Мемлекет басшысы Қасым-Жомарт Тоқаев твиттердегі парақшасында «мемлекеттік органдар қызметкерлерінің салғырттығы салдарынан арандатушылар қантөгіс жасады. Олар жазаланады», — деп жазды.
Комментариев: 0