Subaru Outback-тің жаңа буыны Нью-Йорктегі автосалонда 2019 жылы сәуірде көрсетілді. Компания көліктің дизайнына көп өзгеріс енгізбеуді ұйғарыпты, сондықтан су жаңа универсалды алдыңғысынан ажырата алатындар аз.
Дегенмен салонында өзгешелік бар. Ондағы мультимедиа кешенінің 11.6 дюймдік үлкен экраны бірден көзге түседі.
Техникалық жағына келер болсақ, көліктің платформасы (SGP) жаңарып, Subaru Ascent-тің моторы қойылды. Бірақ 260 ат күшіне ие 2.4 литрлік агрегат біздің елге жеткізілмейді. Біздің Outback 2.5 литрлік атмосфералы мотормен қозғалады. Мамандар моторды жетілдіріп 90 % жаңа компонент орнатқан. Енді ол 188 ат күші мен 245 Нм момент береді және Lineartronic вариаторымен жұмыс істейді.
Қазақстан тұрғындарына модель тек екі жиынтықта ұсынылады. 20 млн теңге тұратын Premium жарықдиодты оптика, алысқа түсетін жарықты автоматты басқару жүйесі, орындықтар мен рөлді жылытқыш, екі аймақты круиз-бақылау, жуғышы бар артқы көрініске арналған камера, Si Drive, X-Mode және Apple CarPlay, Android Auto-мен жұмыс істейтін мультимедиа кешенімен жабдықталады.
Touring жиынтығының бағасы — 22 млн теңге. Ол бұрылғанда шам жарығын өзгерту функциясымен, жүксалғыштың электр жетегімен, люкпен, бірнеше камерамен, сонымен қатар EyeSight электронды көмекшілер кешенімен толыққан. Оған жүргізушінің жағдайын бақылау, бейімді круиз-бақылау, автоматты тежеу, жолақты қадағалау, көрінбейтін аймақтарды бақылау және артқа жүргенде көмек беру функциялары кіреді. Машинаның интерьері Nappa былғарысымен қапталады.
Анағұрлым қарапайым нұсқаларын нарыққа шығармау жөнінде шешім қабылданды, мұның себебі де қарапайым: қымбат универсалды негізінен марканы аса жоғары бағалайтын қалталы адамдар сатып алады. Тіпті базалық комплектациялар да арзан емес. Жалпы жаңа Subaru біздің елде ешқашан қолжетімді болған емес.
Комментариев: 0