Geely Қазақстан нарығына ерекше жаңа өнім шығарады, кроссоверлер топтамасы седанмен толығады. Марка әлеуметтік желіде модельдің тизерін жариялады. Сондай-ақ Geely-дің ресми сайтында оның жеке беті дайын тұр. Ондағы ақпаратқа сүйенсек, Geely Emgrand бір мотор және екі берліс қорабы бар төрт комплектацияда сатылады. Трансмиссияның бірі қазақстандық Emgrand-та ғана болады.
Қазақстан нарығына шыққалы отырған Emgrand седанын Geely Қытайда 2021 жылғы көктемде модельдің төртінші буыны ретінде таныстырған. Машинаның өлшемі — 4638×1820×1460 мм, дөңгелек базасы — 2650 мм. Демек жаңа өнім Hyundai Elantra-мен шамалас болады.
Буыны алмасқан соң Emgrand-тың сырт пішіні ғана емес, салоны да жаңарды. Өз елінде седанның қымбат комплектациясы 10.25 және 12.3 дюймдік екі экранмен жабдықталған.
Машина біздің елде 122 ат күшіне ие 1.5 литрлік бензинді мотормен жүреді, оның қуаты Emgrand-тың Қытайдағы базалық нұсқасынан сәл артық. Ресми сайттағы ақпаратқа сай мотор 5 сатылы механика және 6 диапазонды автомат қораптың бірімен жұптасады. Geely бұған дейін Emgrand-қа автомат қорап орнатпаған, көптеген елде вариатормен жұмыс істейді. Егер Қазақстанда Emgrand шынымен гидротрансформатормен жұптасса, марка біздің нарық үшін седан құрылымын өзгерткенін білдіреді.
Geely седанына келер аптадан бастап тапсырыс беруге болады. Нақты баға сол кезде белгілі болады. Қазір ресми сайтта модель құны 8.99–11.09 млн теңге деп тұр, бірақ бұл баға өзгеруі мүмкін. Механикамен жұмыс істейтін 128 ат күшіне ие мотормен жүретін базалық нұсқадағы Hyundai Elantra-ның бағасы — 9.99 млн теңге.
Комментариев: 0