Қазақстандағы Қытай маркаларының қатары тағы бір брендпен толығады. Ол — 2021 жылы Roborock робот шаңсорғышын өндіруші компанияның көмегімен құрылған Rox Motor стартапы.
Автоөндіруші алғашқы моделін былтыр таныстырды. Дизайнын Pininfarina мамандары жасап, BAW зауытында шыққан 01 индексті толық жетекті гибридтің өлшемі — 5050×1980×1869 мм, дөңгелек базасы — 3010 мм. Үш қатарлы салонында алты немесе жеті орын болады.
01 жалпы қуаты 476 ат күші болатын екі электромотор және генератор рөлін атқаратын 1.5 литрлік бензинді агрегатпен жүреді. Мұндай мотор Li Auto гибридтеріне қойылған. Сыйымдылығы 44.5 және 56 кВт·сағ. болатын екі аккумулятор бар, 01 электр қуатымен 306 км жол жүреді.
Салонда алдыңғы панельдегі 15.6 дюймдік үлкен экран, цифрлы аспаптар панелі және екінші қатардағы жолаушыларға арналған төбедегі 15.6 дюймдік дисплей назар аудартады. Опциялар тізіміне электронды көмекшілер жинағы, 14 динамигі бар аудиожүйе және сымсыз қуаттау құрылғысы кіреді.
«Китайские автомобили» хабарлағандай, Қазақстанда Rox Motor машинасын Kia, Chevrolet, Jetour, JAC және Hongqi-мен жұмыс істеп жатқан Doscar Group компаниясы сатады. Rox Motor дистрибьютормен келісімшартқа 23 қазанда Шанхайда қол қойған. Қазақстанда марка 01-ге 5 жыл немесе 150 мың шақырымға кепілдік береді, ал батареяға 8 жылдық жеке бағдарлама ұсынады. Модель бағасы мен комплектациясы жайлы ақпарат кейінірек белгілі болады.
Біздің елде автомобиль Rox брендімен сатылады, ал өз отанында Jishi 01 деп аталады. Өзге ел нарықтарында ол Polarstone және Polestones сияқты бірнеше атауға ие болады.
Мұндай машина Қазақстан жолдарында кездеседі. Kolesa.kz-тен тапсырыс бойынша алдырған көлікті 20.5 млн теңгеге, ал қолда бар, мемлекеттік нөмір таққан автомобильді 27.3 млн теңгеге табуға болады.
Комментариев: 0