Жуырда мемлекет басшысы Қасым-Жомарт Тоқаев әскери міндетті азаматтарды Қазақстан Республикасы Қарулы күштерінің аймақтық әскерін жасақтау үшін арнайы жиынға шақыру жөнінде жарлыққа қол қойды. Бүгін өткен брифингте қорғаныс министрі Нұрлан Ермекбаев шақырылған азаматтардың басқа өңірлерге жіберілмейтінін айтты. Олар блокбекеттерде қызмет етіп, дезинфекциялық жұмыстар жүргізеді, сонымен қатар нысандарды күзетіп, су тасқынына қарсы шараларға қатысады.
Министрдің айтуынша, заң бойынша 60 жасқа дейінгі офицерлер мен 50 жасқа дейінгі сержанттар, жауынгерлер әскери міндетті болып саналады. Бірақ бірінші кезекте еріктілер мен анағұрлым жас азаматтар шақырылады. Жуырда әскери комиссариат шақыру қағаздарын жібере бастайды. Арнайы жиынға келмегендер жауапқа тартылады, әрі Отан алдындағы борышын орындауға бәрібір міндеттеледі.
Kolesa.kz тілшісіне министрліктің баспасөз қызметі хабарлағандай, «қызметке» жеке және заңды тұлғалардың көлік құралдарын тарту жоспарда жоқ.
Сонымен қатар, министрлік жиынға шақырылмайтын азаматтардың тізімін жариялады. Олар:
- қорғаныс, қауіпсіздік және құқықтық тәртіпті қамтамасыз етумен айналысатын мемлекеттік орган қызметкерлері;
- авиациялық қызметкерлер;
- фермерлер;
- педагогтар;
- күндіз оқитын студенттер;
- әскери міндетті әйелдер;
- 18 жасқа дейінгі үш және одан көп баласы бар азаматтар;
- үстінен тергеп-тексеру жұмыстары жүргізіліп жатқан тұлғалар;
- парламент және жергілікті өкілдік орган депутаттары.
Комментариев: 0