Қазақстандағы үш қалада пилотсыз көліктер сынақтан өтеді

Цифрлық даму, Көлік және Ішкі істер министрлігі автономды басқару деңгейі шартты және жоғары көлік құралын іске қосу бойынша пилоттық жобаны жүзеге асыру ережесін биыл 4 тамызда бекітті. Пилотсыз машина үш жыл бойы Астана, Алматы және Қосшы қалаларындағы арнайы полигонда, полиция жүруге рұқсат берген жалпыға ортақ жолда сынақтан өтеді.

Ережеде автономды деңгейі әртүрлі көлік құралына қойылатын талаптар өзгеше. Автономды деңгейі шартты автомобильде кез келген сәтте тізгінді өз қолына алуға дайын адам міндетті түрде отыруға тиіс. Жоғары деңгейдегі көлікті жүргізушісіз пайдалануға болады, бірақ қашықтан жұмыс істейтін оператор жағдайды қадағалап отыруы керек.

Құжатта қауіпсіздікке қойылатын міндетті талаптар да жазылған. Ережеде көлік құралы дерек тіркеу жүйесі, бейнебақылау, автономды басқару жүйесін шұғыл өшіру тетігі, «Автономды басқару» деп жазылған арнайы белгі және бағдарламалық жасақтаманың жұмысына сырттан араласудан қорғайтын механизммен жабдықталуы қажет делінген.

Әзірлеушілер жолаушы тасымалдау, құқық қорғау органымен байланыс және жол-көлік оқиғасы кезінде әрекет ету мәселелеріне ерекше мән берген. Ереже автономды машинаны такси қызметі және жолаушы тасымалы үшін пайдалану тәртібін реттейді, сондай-ақ пилоттық жоба қатысушыларының жауапкершілігін сақтандыруға қойылатын талаптарды белгілейді.

Биыл мамырда пилотсыз аэротакси жобасы пайда болды. Ұшатын машиналар Алатау қаласында, Алматыда және Алматы облысында іске қосылмақшы.