Қазақстанда жасалған JAC Ресейде сертификат алды

Росстандарт базасында «СарыарқаАвтоПром» зауытында құрастырылған JAC S6 кроссоверіне тиесілі Көлік құралының типін мақұлдау құжаты пайда болды.

КҚТМ күшіне енген, алайда жаңа модельдің де, қаңтарда Кедендік одақ құжатын алған S4-тің де сатылымға шығатын күні туралы ақпарат жоқ.

S6 атауымен ЕЭО нарығына Sehol QX шығады. Модель аспасы тәуелсіз MIS Haoxue платформасына негізделген. Біздің тұрғындарға 4.6 метрлік S6 тек 174 ат күшіне (280 Нм) ие 1.5 литрлік турбомотормен ұсынылады. Айта кетерлігі, өз отанында HFC4GС1.6Е индексті агрегат 184 ат күші мен 300 Нм момент береді. Қозғалтқыш 6 сатылы механикамен не диапазоны дәл сондай робот қораппен жұмыс істейді.

Машинаға 18 дюймдік дөңгелек орнатылады. Жабдықтар тізімінде айнала шолу камералары, круиз-бақылау, панорамалық шатыр, климат-бақылау мен электронды көмекшілердің стандарт жинағы бар.

S6-ның Қазақстанда не Ресейде қаншаға сатылатыны белгісіз. Қытайда мұндай кроссовердің бағасы теңгемен есептегенде 7.5 миллионнан басталып, 14.5 млн-ға дейін барады.