Қазақстанда тағы бір тас жол ақылы болады

Көлік министрі республикалық маңызы бар Павлодар — Семей — Қалбатау тас жолы және Ресей шекарасы (Омск) — Майқапшағай (Қытай шекарасы) ақылы болатыны туралы бұйрыққа 27 қыркүйекте қол қойған, ол 8 қазанда күшіне енеді. Құжатқа сәйкес жол ақысын жүк көлігі мен автобус жүргізушілері ғана төлейді.

Бір бағытта (453 шақырым) жол ақысы төмендегідей:

• орын саны 16-ға дейінгі автобус және 2.5 тоннаға дейін жүк көтеретін көлік — 656 теңге;
• орын саны 32-ге дейінгі автобус және 5.5 тоннаға дейін жүк көтеретін көлік — 1313 теңге;
• орын саны 32-ден асатын автобус және 10 тоннаға дейін жүк көтеретін көлік — 1969 теңге;
• 10-15 тоннаға дейін жүк көтеретін көлік — 2626 теңге;
• тіркемесі бар жүк көліктері мен ершікті тартқыштарды қоса алғанда, 15 тоннадан ауыр жүк көтеретін автомобильдер — 3283 теңге.

Автомобильдің жүк көтергіштігіне байланысты иесі 1-5 АЕК тұратын айлық немесе құны 12-60 АЕК жылдық абонемент сатып алса болады.

Ақылы аймақта шлагбаум болмайды. Автомобильдерді бейнекамера мен сезгек арқылы бақылайды, ал жүргізушілер жол ақысын төлеу үшін RFID-белгісін сатып алып, тағуға міндетті.

Жүргізушілер Ертіс өзені арқылы өтетін көпірмен, республикалық маңызы бар Ленинский — Ақсу — Көктөбе — Үлкен Ақжар — Курчатов, Өскемен— Таврическое — Семей тас жолдарымен, облыстық маңызы бар Семей — Курчатов және Алматы — Өскемен трассасының Өскемен — Қалбатау бөлігімен тегін жүре алады.

Биыл 3 қазаннан бастап елімізде 11 ақылы жолда жүру бағасы 20 % өсетінін естеріңізге саламыз.