Baidu концерніне тиесілі Apollo Go роботакси сервисі біздің нарыққа кіреді. Cnevpost хабарлағандай, оператор Тимур Турлов негізін қалаған TPH (Turlov Private Holding) инвестиция қорымен келісімге келді. Шараға цифрлық даму министрі Жаслан Мәдиев те қатысты.
Пилотсыз такси қашан жолға шығатыны белгісіз. Сервис тек Қытаймен шектелмейтінін айта кеткен жөн. Apollo Go көліктері Дубайда жүр, жуырда Швейцария мен Оңтүстік Кореяда жұмыс бастайды. Басылым машиналар осы уақытқа дейін 22 млн сапар жасап үлгергенін, жалпы 220 млн шақырымды артқа тастағанын атап өтті.
Біздің елде роботакси сервистері сынақтан өтіп жатыр. 2025 жылдың аяғында арнайы ХҚКО аумағында автономды таксомоторлар тестке қатысты, биыл олар жалпы жолмен қозғалуға тиіс. Осы бағытты дамытуды көздейтін меморандумға Жасанды интеллект және цифрлық даму министрлігі, Көлік министрлігі, Астана қаласының әкімдігі және Yandex Qazaqstan компаниясы қол қойды.
Комментариев: 0