Қазақстанда пилотсыз автомобильдер жолға шығады

Бүгін үкімет отырысында Цифрлық даму, инновациялар және аэроғарыш өнеркәсібі министрі Жаслан Мәдиев пилотсыз транспортты дамыту жоспарын таныстырды, ол үшін билік саланы реттейтін нормативтік-құқықтық акт әзірлеп, пилотсыз көлікті сынақтан өткізетін арнайы алаң дайындайды, технологияларды Waymo (Google), Tesla, Baidu, Mobileye, Yandex, Huawei сияқты халықаралық серіктестермен бірге сынақтан өткізеді.

«Бұл зерттеулерге, инфрақұрылымға және автономды автомобиль компонентін өндіруге шетелден инвестиция тартуға жағдай жасайды. Мысалы, БАӘ WeRide және Cruise компанияларына Дубайда пилотсыз таксиді тестілеуге мүмкіндік берді, бұл жергілікті транспорт саласын цифрландыруға жол ашты. Пилотсыз технология саласындағы жергілікті стартаптардың дамуына да ықпал етеді. Бастамалар іске асса, Қазақстан аймақтағы технологиялық хаб мәртебесін нығайта түседі», — деді министр.

Ол электрлі көлікті танымал ету бағдарламасын әзірлеп, электрокар инфрақұрылымын дамытуды және халықты электромобиль сатып алуға шақыруды ұсынды. Мысалы, автотұрақ пен қоғамдық көлік жолағын пайдалануға жеңілдік жасау керек.

Алматыда былтыр күзден бастап электромобиль мінгендер автотұрақты тегін пайдаланады. Ол үшін машина иесі «Алматы паркингке» тіркелуі қажет. Пилотсыз машинаға қатысты ұсыныс қызық көрінеді. Біздің жолдарда ақылды автомобиль жүре алады деп ойлайсыз ба?