Қазақстанда қай өңір «әдемі» нөмірге қызықпайды?

2024 жылы елдегі жүргізушілер әдемі нөмірге 15.8 млрд теңге (31.6 млн доллар) жұмсаған. 24.kz хабарлағандай, ІІМ мұндай нөмірге Алматы тұрғындары әуес екенін анықтады. Олар 5 млрд теңгеге сәнді нөмір алыпты. Екінші орында елордалық жүргізушілер (2.5 млрд теңге) тұр. Үшінші сатыдағы Шымкент автомобилистері VIP-цифр/әріп үшін 2 млрд теңге санап берген. Ұлытау жұрты мұндайға әуес емес екен, олар нәбәрі 90 млн теңгеге қымбат нөмір алыпты.

Статистика бойынша Ұлытауда тіркелген автомобиль саны Алматыдан 26.4 есе аз. Ал «әдемі» нөмірге сұраныс оңтүстік астанаға қарағанда 55.5 есе төмен. Демек бұл өңірдің тұрғындарын үнемшіл немесе қарапайым деуге болады.

Қазақстандағы ең қымбат мемлекеттік нөмірлер — әріптері бірдей 001, 002, 003, 004, 005, 006, 007, 008, 009, 777 цифрлары. Мұндай аса сәнді нөмір алу үшін 285 АЕК (2025 жылы 1 120 620 теңге) төлеуге тура келеді. 2024 жылы АЕК төмен кезде құны 1 052 220 теңге болған.

Салыстыру үшін айтсақ, әдеттегі мемлекеттік нөмір 2.8 АЕК (11 009.6 теңге) тұрады.

«Азаматтарға арналған үкімет» корпорациясы 2023 жылы Қазақстан азаматтары 10 млрд теңгеге 30 мыңға жуық «әдемі» нөмір алғанын хабарлаған. 2022 жылы көлігіне VIP-нөмір таққанды жөн көретіндер қазынаға 7 млрд теңге құйды.

Салық кодексінің жаңа нұсқасына сәйкес белгіленген соманы төлеп, кез келген нөмірге тапсырыс беруге мүмкіндік бар.