Жанармай құятын бекеттерде газ жетіспей жатқаны бірнеше айдан бері белгілі. Батыс облыстарда және елдің оңтүстігі мен солтүстігінде машинасы газбен жүретін азаматтар сағаттап кезекте тұруға мәжбүр. Кей жанармай бекеті отынды талонмен сатса, кейбірі қосымша тауар қосып беріп жатыр, ал кейбірі жұмыс істемей тұр.
Бірақ бүгін энергетика министрі Алмасадам Сәтқалиев елде сұйытылған мұнай газ тапшылы емес деді. Әкімдіктер оны кейбір бекетке таратпай отырған көрінеді.
«Әкімдіктер ай сайын шамамен 160–170 мың тонна тапсырыс береді. Оның 130–140 мың тоннасы жоспар бойынша жеткізіледі. Қалған бөлігін резервтен аламыз. Кей өңірде тұтыну мөлшері артқаны байқалып отыр. Біз бұған газбен жүретін машина көбейгені себеп болды деп санаймыз. Министрлiк газдың көп бөлігі мұнай-химия саласына бөлiнетiнiн ескертсе де, олар (автомобилистер — Kolesa.kz редакциясының ескерт.) автогаздан бас тартпай отыр» деп келтірді минирстрдің сөзін Informburo.kz.
Министр айтқандай кей әкім жанармай ай сайын үздіксіз келетініне сенбей, қолдағы қорды бекетке жеткізбей ұстап отыруы мүмкін. Ешкім өзі жауапты аймақты газсыз қалдырғысы келмейтіні анық. Бірақ газ тапшылығына А.Сәтқалиев айтқандай «тұтынудың артуы» ғана кінәлі ме?
Елде газбен жүретін машина шынымен көбейіп кетті ме деп ресми статистиканы тексердік. Былтыр 1 қазанда Қазақстанда таза газбен жүретін және гибрид қондырғысы (газ — бензин) бар автомобиль саны 407 237 болған. Биыл 1 тамызда олардың саны — 428 133, 1 қыркүйекте — 429 788 дана болды. Яғни газ баллоны бар көліктер қатарына бір жылда небәрі 22 551 (5.5 %) машина кірген. Мұны аса көп деуге келмейді.
Осыдан бірнеше жыл бұрын билік жүргізушілерді экологиялық таза отын ретінде сұйытылған мұнай газына көшуге шақырған.
Бірақ 2023 жылдан бастап шенділердің позициясы өзгеріп, елде газ арзан, сол үшін бағаны бензин құнымен теңестіру керек деп шықты. Содан соң жанармай құю бекеттерінде кезек көбейіп, кінәлілерді іздеу басталды. Kolesa.kz редакциясы билік айтқан себептерге шолу жасап көрді. Мысалы, әу баста олар жанармай құятын бекеттердегі отын шетелге кетіп жатыр деп мәлімдеді, өйткені ол елдерде газ қымбат. Ал былтыр жазда шенділер газ баллоны бар машина мінген туристер газ тапшылығына кінәлі екенін айтқан. Енді әкімдер үнемшіл болғандықтан жанармай бекеттерінде кезек пайда болды-мыс. Ал газ тапшылығына басты кінәлілер машинасына ГБҚ орнатқан жүргізушілер екен. Мүмкін мәселенің түп-тамыры мұнай компанияларында жатқан шығар? Өйткені отын бағасының тұрақты түрде өскені оларға тиімді болып отыр.
Комментариев: 0