Қазақстанда мотор майын таңбалау міндетті болады

Елде мотор майы таңбаланады. Билік ыдысқа көшіріп жасау не қайта пайдалану мүмкін емес цифрлы код көмегімен өнім айналымын бақылауды көздейді.

Бұған алаяқ жеткізушілердің танымал брендтердің түпнұсқа ыдысына контрафакт өнімді құйып сатуы себеп болып отыр. Соның салдарынан тұтынушылар жалған өнімді түпнұсқадан ажырата алмайды.

Энергетика министрлігі хабарлағандай, мотор майын өндірушілер, импорттаушылар, сондай-ақ көтерме және бөлшек саудамен айналысатын сатушылар қаңтардың аяғына дейін мына сілтеме арқылы ресми порталға өтіп, арнайы ақпараттық жүйеде тіркелуге тиіс.

Жаңа механизм кезең-кезеңімен енеді. 2026 жылғы 1 ақпаннан бастап Қазақстанда жасалған немесе осы күннен кейін елге әкелінген мотор майын міндетті түрде таңбалау керек. Ал бір жылдан соң, яғни 2027 жылы 1 ақпаннан бастап шенділер тауарды жеткізу тізбегін толық бақылауға алады.