Қазақстанда электросамокат жылдамдығы шектеледі

Мемлекеттік стандарт жобасына сай электросамокат — екі не үш дөңгелегі бар, электр қозғалтқышпен жүретін, орындығы жоқ, бір адам ғана тасымалдауға арналған, ең жоғары жылдамдығы сағатына 25 км-ден аспайтын электрлі жеке мобильділік құралы. Кері жүрген кезде немесе жаяу жүргінші режимінде жылдамдық 6 км-ден аспау керек.

Сондай-ақ жылдамдық бағдарламалық жасақтама деңгейінде шектеледі. Ең жоғары жылдамдықты арттыру немесе белгіленген жылдамдық шегін алып тастау мақсатында кез келген түйінді өзгертуге тыйым салынады.

Электросамокаттың алды мен артына шам және төрт жағына жарық қайтаратын құрылғы орнатылуы керек. Дыбыстық сигналы бірдей әрі анық естілетін болуы қажет.

Жаңа стандарт елге бұрын әкелінген жеке мобильділік құралына және мыналарға қолданылмайды:

• өзін-өзі теңшеу жүйесі бар немесе ол жоқ электрлі қозғалыс құралына (басқару тұтқасы бар немесе ол жоқ гироскутер және монодөңгелек);
• балаларға арналған ойыншық ретінде жіктелген құрылғы;
• өзін-өзі теңшеу жүйесі жоқ, орындығы бар құрылғы;
• жарысқа қатысуға арналған құрылғы;
• электрлі велосипед;
• мүгедектерге/медициналық көмек көрсетуге арналған құрылғы;
• ең жоғары жылдамдығы 25 км/сағ-тан артық құрылғы;
• кернеуі 100 В-тан жоғары тұрақты ток/немесе кернеуі 240 В-тан жоғары айнымалы ток батареясы бар құрылғы;
• басқаратын жүргізушісі жоқ құрылғы.

Алда ҚР жол ережесінде электросамокат велосипедке теңестіріліп, жолдың жүріс бөлігінің шетімен және тротуармен жүруіне рұқсат береді және жаяу жүргіншілерге жақындағанда жылдамдықты сағатына 6 км-ге дейін төмендету міндеттеледі.

Жаңа стандарт биыл күзде қолданысқа енуі мүмкін. Қазірше алғашқы техникалық талқылау ғана өтті. Стандарт күшіне енгеннен кейін ҚР ЖҚЕ және Әкімшілік кодексте электросамокатқа қатысты нормалар бекітіледі.

Айта кетейік, ҚР ІІМ мәліметі бойынша биыл жыл басынан бері елімізде электросамокат қатысқан 41 жол апаты тіркелген. Оның бірінде кісі қайтыс болды. Ал 2021 жылы осындай 68 апат болып, бір адам қаза тапты және 71 адам жараланды. Мұндай жол-көлік оқиғасы Алматыда ең көп тіркеледі.