Қазақстанда автомобильді тіркеу ережесі қалай өзгереді

ҚР ІІМ автомобиль тіркеу қағидасына өзгеріс енгізді, ол 2026 жылы 12 қазанда күшіне енеді. Құжатқа сәйкес жеке тұлға өзі пайдалану мақсатында көлік құралын елге әкелгенде алғашқы тіркеу ақысын төлеуі қажет:

• Қазақстанға ЕАЭО-ға мүше емес мемлекеттерден кірген автомобиль үшін — кеден органы еркін айналымға шығарғанға дейін.

ҚР аумағына ЕАЭО мемлекеттерінен әкелген автомобиль үшін механизм бұрынғыдай — арнайы ХҚКО-да есепке қойғанға дейін.

Ережеге жеке техникалық шығармашылық нәтижесі саналатын тіркемені тіркеу тәртібін реттейтін тармақ қосылады. Оныі есепке қою үшін мынадай құжат ұсыну қажет:

• жеке куәлік немесе цифрлық құжаттар сервисі арқылы оның электрондық нұсқасы (жеке басын сәйкестендіру үшін);
• тіркеу алымын және техпаспорт пен мемлекеттік нөмір алуға арналған мемлекеттік алымды төлегенін растайтын құжат;
• ТР ТС 018/2011 талабына сәйкес аккредиттелген сынақ зертханасы берген сынақ хаттамасы;
• ҚР ІІМ әкімшілік полиция комитеті берген көлік құралына сәйкестендіру нөмірінің тағайындалғаны туралы құжат;
• көлік құралы құрылымының қауіпсіздігі туралы куәлік.

Құзырлы орган құрылымы өзгерген көлік құралын міндетті түрде тексеру талабын тіркеу ережесінен алып тастады. Ал шетел азаматының автомобиліне берілетін мемлекеттік нөмірлер сериясының тізімі мынадай болады:

• D — Қазақстанда аккредиттелген дипломатиялық өкілдік, халықаралық ұйым және (немесе) олардың өкілдіктерінің, консулдық мекемелердің қызметкерлеріне тиесілі қызметтік және жеке көлікке;
• T — Қазақстанда аккредиттелген дипломатиялық өкілдік, халықаралық ұйым және (немесе) олардың өкілдіктерінің, консулдық мекемелердің әкімшілік-техникалық персоналына тиесілі қызметтік және жеке көлікке;
• HC — құрметті консул лауазымына ие тұлға басқаратын консулдық мекемелердің қызметтік және жеке көлігіне;
• M — шетелдік заңды тұлғаның Қазақстан аумағында тіркелген филиалы мен өкілдіктерінің автомобиліне;
  H, C, L, P, J, K, S және Y — Қазақстанда тіркелген құрамында шетелдік қатысушы бар заңды тұлғаның көлігіне;
• F, T, A, G, I, N және R — шетел азаматтары мен азаматтығы жоқ адамдардың көлігіне.

D, T және HC сериялы нөмірі бар көлік құралын жолға шығару үшін дипломатиялық корпуспен жұмыс істейтін ұйымнан арнайы стикер алу қажет. Мұндай мемлекеттік нөмірдің жарамдылық мерзімі стикердің қолданылу мерзімімен бірдей болады.