Қазақстан жолдарында жүздеген жол белгісі қолды болған

2023 жылдың басынан еліміздің трассаларынан мыналар ұрланған:

• 100 жол белгісі;
• шамамен 100 стробоскоп;
• малдан қорғайтын 7 мың метр тор қоршау;
• қар бөгейтін 10 аралық темірбетон дуал;
• 100 метрдей қар бөгейтін уақытша ағаш қалқан;
• 300 қисық сызықты білеу консолі;
• 2 жарық беру желісінің трансформаторы.

«Қазавтожол» ұлттық компаниясы ұрлау фактісі бойынша Ақмола облысы көш бастап тұрғанын хабарлады. Одан кейін Ақтөбе, Маңғыстау, Павлодар және Солтүстік Қазақстан облыстары тұр.

Жолшылардың сөзінше көбіне іргелес ауыл тұрғындары ұрлыққа түседі. Оңай тапқан олжасын олар тұрмыстық мақсатта қолданады екен. Төртбұрышты жол белгілерінен күрек, ал домалағынан қазан мен кәстрөлге қақпақ жасайды-мыс. Жарықдиодты катафотты велосипедке бекітіп, бөгеуіш торды үйді қоршауға пайдаланады.

Қазавтожол өкілдері тас жолды күнде күзетіп, жергілікті халыққа түсіндірсе де, қылмыс азаймай тұр. Жыл басынан республикалық маңызы бар тас жолдардан жалпы құны 20 млн теңге (2021 жылы — 60 млн теңге) болатын жол инфрақұрылымының элементтері қолды болыпты.