Басқа мемлекетте тіркелген көлік құралын Қазақстан аумағына кіргізу және оларды ел аумағында пайдалану ережесі мен талаптары туралы үкімет қаулысы шықты.
Құжат 9 желтоқсанда күшіне енді.
Онда не жазылған?
Енді басқа мемлекетте тіркелген автомобиль Қазақстан аумағында халықаралық қозғалыс бойынша ғана жүре алады. Ал бұл режимді шетел азаматы және Қазақстанда тұруға ықтиярхаты немесе азаматтығы жоқ адамдар ғана пайдалана алады.
Қазақстан азаматы, сондай-ақ Қазақстанда тұрақты тұратын шетелдік тұрғын Қазақстанда тіркелген машинаны ғана жүргізе алады.
Шетелдік көлік Қазақстанда қанша уақыт жүре алады?
Халықаралық қозғалысқа қатысатын автомобиль мемлекет шекарасын кесіп өткен сәттен бастап Қазақстан аумағында бір жылға дейін бола алады. Осыдан кейін машина кемінде 30 күнге Қазақстан аумағынан шығуы қажет.
Халықаралық қозғалыстағы автомобиль мынадай құжаты болса Қазақстан жолдарында жүре алады:
- көлік құралын, тіркемені мемлекеттік тіркеу туралы куәлік (техпаспорт);
- мемлекеттік тіркеу нөмірі;
- мемлекеттің айрықша белгісі;
- көлік құралын сәйкестендіру белгісі;
- техникалық тексерістен өткенін растайтын диагностикалық карта;
- меншік иесінің азаматтық-құқықтық жауапкершілігін міндетті сақтандыру шарты.
Жаңа ереженің алғашқы нұсқасында Қазақстанға ЕЭО елдерінен келген машинаны электронды паспорт жүйесінен тексеру міндетті болған. Бірақ қаулыға өзгеріс еніп, бұл норма алынды, өйткені Қазақстанның электронды паспорт жүйесі өзге ЕЭО елдерінің базасымен әлі біріккен жоқ.
Ереже бойынша халықаралық қозғалыстағы автомобиль Қазақстанда техникалық тексеріс (7 жасқа толмаған машина өтпейді) пен сақтандырудан өткеннен кейін ғана ел аумағында жүреді.
ҚР жол ережесі бойынша халықаралық қозғалысқа қатысатын машина мен тіркеме біздің елге кірген соң 90 күн техникалық тексерістен өтпей жүре алады. Егер ел аумағында осы мерзімнен көп уақыт қалатын болса, автомобильді техникалық тексерістен өткізу керек.
Құжатты кім тексереді
Елге келген шетелдік көліктің құжатын шекарашылар тексереді. Олар Қазақстанға кіретін автомобиль туралы ақпаратты ІІМ деректер базасымен біріккен ақпараттық жүйеге енгізеді. Осы дерекке сүйеніп, машинаның халықаралық немесе Қазақстанда іздеуде бар-жоғы тексеріледі. Қылмысқа қатысы бар көлік анықталса, оны ұстап, полицияға тапсырады.
Қазақстан азаматы шетелдік көлікті қалай әкеледі
Біздің елдің азаматы шетелдік көлікті Қазақстанда есепке қою мақсатында ғана әкеле алады. Шекарада мына құжаттарды көрсету керек:
- көлік құралын тіркеу туралы куәлік (техпаспорт);
- иесі мен автомобиль туралы ақпарат және жеткізетін орны мен машинаны қабылдау шарты (тасымалдау қызметтерін пайдаланған жағдайда) жазылған автомобильді Қазақстан аумағына жеткізу туралы шарт;
- көлік құралының электронды паспорты жүйесінен алынған ақпарат (бұл тармақ қажет емес екенін жоғарыда жаздық).
Қалған құжатты (сатып алу-сату шарты және т.б.) арнайы ХҚКО-да тіркелген кезде көрсетесіз.
Полицейлер 2022 жылғы 1 қыркүйектен кейін елге кірген шетелдік көліктер мәселесін қалай шешетінін әлі айтқан жоқ, мұндай машинаны елден шығара ма, иесіне айыппұл сала ма, әлде жүргізуші куәлігінен айыра ма, белгісіз.
Ресей нөмірін таққан машиналарды Қазақстан азаматтарына жалға беретін каршеринг компаниялары мен шетелдік жүк көліктерін пайдаланып жүрген бірлескен кәсіпорындар енді не істейтіні түсініксіз. Жаңа ереже бойынша тұрғындар мұндай машинаны міне алмайды. Әкімшілік полиция комитеті бұл мәселеге қатысты жақында Kolesa.kz редакциясына толық ақпарат беруге уәде етті.
Комментариев: 0