Қазір Қарағанды — Балқаш жол бөлігіндегі 277 км жаңа асфальтобетон жолмен машина жүріп жатыр. ҚР ИИДМ Автомобиль жолдары комитетінің төрағасы Төлеген Абдуллиннің болжамы бойынша 2023 жыл аяқталғанша жол бөлігі толық ашылады. Құрылысты аяқтау үшін 86 шақырым жолды жасау керек екен.
363 шақырымға созылған Қарағанды — Балқаш тас жолын жөндеуді мамандар 2019 жылы бастаған. Жұмыс аяқталғанда төрт жолақты жол бірінші техникалық категорияға сай болады.
«Балқаш — Бурылбайтал және Бурылбайтал — Күрті бөлігімен 2023 жылдың соңына қарай жүру мүмкін болады. Күрті — Қапшағай бөлігінде де құрылыс-монтаж жұмыстары жүріп жатыр. Бұл жол 2024 жылы қолданысқа беріледі», — деді АЖК төрағасы.
Айта кетерлігі, Қарағандыға бара жатқанда Бурылбайтал маңындағы тас жолдың қандай жағдайға екенін бір ай бұрын Роман Масленников түсіріп алған. Содан бері бірдеңе өзгерді ме екен?
Абдуллиннің сөзіне сенсек келер жылы 768 шақырымдық Талдықорған — Қалбатау — Өскемен жолында көлік қозғалысына рұқсат беріледі. Оның 38 км-і бірінші, қалғаны екінші техникалық категорияға сай болады. Одан бөлек Қызылорда — Қарабұтақ — Ақтөбе — РФ шекарасы бөлігін жөндеу басталады.
Шенділер Қызылорда маңындағы тас жолды 2030 жылға қарай төрт жолақты етуді көздеп отырғанын еске сала кеткен жөн. Істің ұзаққа созылуына күрделі логистика мен құрылыс материалдарын жеткізу қиындығы себеп болды. Ең жақын карьер жүздеген шақырым қашықта орналасқан.
Комментариев: 0