Соңғы аптада облыста коронавирус жұқтырған 303 адам бары анықталды. Олардың көбі Қарағанды, Теміртау, Жезқазған, Саран, Қарқаралы қалалары мен Шет, Бұқар жырау және Абай аудандарында тұрады.
Мамандар халықтың оқшаулану режимін бұзып жатқандығын айтады.
Елдегі бас санитар дәрігердің талабы бойынша, егер өңірдегі ауру деңгейі 7 %-дан асатын болса, карантиндік шаралар қайта күшіне енеді. Қарағанды облысында соңғы аптада қауіпті вирусты жұқтырғандар саны 7.3 %-дан асты. Соның нәтижесінде карантинді күшейту жөнінде шешім қабылданды.
Нақтырақ айтсақ, 13 маусымнан бастап Жезқазған қаласы, Қарқаралы ауданы және Шет ауданына қарасты Жарық ауылы қоршалады. Мемлекеттік органдар мен бюджеттік ұйым қызметкерлерінің 70 %-ы қашықтан жұмыс істейді. Қоғамдық орындар мен сауда нысандарының жұмыс уақыты қысқарады.
Жеке көлік қозғалысына 23:00-ден 5:00-ге дейін тыйым салынса, ХҚКО 10:00-ден 17:00-ге дейін қызмет көрсетеді. Таксиге тек бір жолаушының не бір ересек адам мен кәмелетке толмаған екі баланың отыруына рұқсат беріледі.
Қарағанды облысы блокбекет қайта қойылатын жалғыз аймақ болмауы мүмкін. Жуырда ведомствоаралық комиссия отырысында премьер-министрдің орынбасары Ералы Тоғжанов індет өршіген аймақ әкімдеріне карантиндік шараларды күшейту мәселесін қарастыруды тапсырды.
Комментариев: 0