Қапта тұрып құны өскен Land Cruiser (J79)

Жаңа оңтүстік Уэльстің тұрғыны 70th Anniversary шектеулі топтамасындағы Toyota Land Cruiser 70-ті саудаға шығарды. Ол 2021 жылғы темір тұлпарын 39 мың Аустралия долларына (41 млн теңге) бағалады, бұл өз құнынан екі есе қымбат. Иесі машинаны коллекциялық мұрағат деп танып, ерекше жағдайда сақтапты.

Екі жыл бұрын алған Land Cruiser-ін жүргізуші пластик қап ішіне кіргізіп қойған. Ерекше қапқа салмай тұрып көлікті барлық техникалық сұйықтықтығынан арылтып, аккумуляторын алып, электр көзінен ажыратыпты.

1 / 7

• 
• 
• 
• 
• 
• 
• 

1 / 7

Пикаптың одометрі небәрі 12 шақырым көрсетіп тұр. Көлік иесі бұндай Land Cruiser біреу-ақ деді. Модельдің культ мәртебесінен бөлек осы түрленімі сирек кездеседі екен. Бренд 70th Anniversary сериясында 600 автомобиль ғана шығарса, оның тек 70-і осы түске боялған екі кабиналы пикап.

Бұл машиналар дизайнерлік акценттерімен ерекшеленеді. Винтажды радиатор торы, қара түсті дөңгелек аркасын кеңейткіш, бірегей дөңгелек дискілері мен айрықша әрленген салон көздің жауын алады. Пикап 4.5 литрлік дизельді V8-бен (205 а.к; 430 Нм) жүреді. Егер көліктің жаңа иесі машинаны қозғалыс құралы ретінде емес, инвестиция үшін алса, оны пластик қабымен алуына болады.

Toyota кей елдер үшін әлі Land Cruiser 70 шығарады. Аустралиядан бөлек машинаны Оңтүстік Африка мен Таяу Шығыс елдері сатып алады. Бұған дейін модель Land Cruiser 300-дің арзан баламасы ретінде өз отанына оралуы мүмкін деген болжам жасалған.