Қанша тұрғын жүргізуші куәлігін онлайн ауыстырды

Қызмет көрсету уақытын қысқарту және азаматтарды ХҚКО мен арнайы ХҚКО-ға бос жүгіртпеу үшін билік бірнеше жыл бұрын цифрлы сервисті жолға қойды. Қазірге дейін 7 млн адам түрлі онлайн қызмет алыпты, соның ішінде 167 мың тұрғын жүргізуші куәлігін ауыстырған екен. Бұл туралы Polisia.kz хабарлады.

Жүргізуші куәлігін онлайн ауыстыру қызметі 2018 жылғы наурызда пайда болды, бірақ ол кезде мұны eGov.kz порталы арқылы ғана жүзеге асыруға болатын, ал былтыр жаздан бастап бұл қызмет екінші деңгейлі банктердің мобильді қосымшасында қолжетімді болды. ІІМ айтқан 167 мың адам 2018 жылдан бергі есеп пе, әлде банк қосымшасынан онлайн куәлік алғандар ма, белгісіз.

Қазір Қазақстан азаматы ел ішінде жүргізуші куәлігін алып жүрмесе де болады. Тиісті заң 2021 жылы ақпанда күшіне енген, полиция қызметкері өзге құжатты деректер базасынан тексере алады. Ал былтыр 26 шілдеде билік eGov Mobile мен банк қосымшасындағы цифрлы құжатты қағаз құжатпен тең қолдануға рұқсат берді. Демек полицияға смартфоннан куәліктің электронды көшірмесін көрсетсеңіз болғаны.