Қайта жанданған Toyota MR2: 400 ат күшіне ие мотор мен толық жетек жүйесі?

Toyota іштен жанатын қозғалтқыштың жаңа топтамасын әзірлейтінін хабарлаған болатын, оған қуатты агрегаттар да кіреді. Инсайдерлердің мәліметінше мұндай мотордың бірі аты аңызға айналған орта моторлы MR2-нің жаңарған нұсқасына орнатылады.

BestCar басылымының дереккөздері компания спорткардың концептісін жасап қойғанын айтады. Бұрынғыдай салонның артына жайғасқан бензинді қозғалтқышы бар екі орынды купе болады. Соңғы мәліметтерге сүйенсек, жаңа MR2 400 ат күшіне ие 2 литрлік қозғалтқышпен жүреді. Сондай-ақ толық жетек жүйесімен жабдықталады.

Toyota MR2 ықшам болғандықтан қазіргі Supra-дан төменгі орында болады деген болжам жасалған еді. Сонымен қатар инженерлер GR Corolla-ның 1.6 литрлік турбоүштігін орнатпақ болған. Бірақ жаңа қозғалтқышты әзірлеу кезінде бұл концепт өзгерген сияқты.

Спорткардың болжамды бағасы 70 мың доллар шамасында. Қызығы, жаңа өнім қазіргі Toyota GR Supra-дан қымбат болады. Екі модельдің нарықтағы орны әлі белгісіз, бірақ 2026 жылы MR2 сатылатын кезде GR Supra өндірістен алынуы мүмкін.

Жаңа қозғалтқыштарға келетін болсақ, инсайдерлердің мәліметінше Toyota оларды сынақтан өткізуді бастап кетті. 2 литрлік төрт цилиндрлі қозғалтқыш Lexus модельдерінің бірнеше шассиінде сынақтан өтуде. Қозғалтқыш 600 ат күшін берді деген сыбыс бар, бірақ мұндай мотор тек жарыс прототипіне орнатылады.