Қасым-Жомарт Тоқаев мегаполис тұрғындарымен кездесуде ескірген және экологияға зиян көлік түрлерінен бас тарту қажет екенін айтты.
«2025 жылдан кейін Алматыда дизельді автобус қалмауы керек, олардың орнын электрлі және газбен жүретін қоғамдық көліктер басады. Транзиттік жүк көліктерін Үлкен Алматы айналма жолымен жүргізу қалаға оң әсер етеді. Ол үшін алты радиалды және төрт ішкі магистральді көше салу керек. Үкімет әкімдікпен бірге осы жобаларды қаржыландыру мәселесін талқыласын. Сондай-ақ қалаға кіре берістегі негізгі жолдарды тездетіп қайта жөндеу қажет. Бұл маңызды жұмысты Алматы агломерациясы аясына үйлестіру керек», — деді мемлекет басшысы.
Президенттің айтуынша қазір қалалық бағыттардың көбі өте ұзақ, қалалық және қала маңындағы қоғамдық көліктердің өзара байланысы нашар, тасымалға ыңғайлы көлік тораптары жоқ. Бұл жағдайды тез арада өзгерту қажет, қоғамдық көліктің тиімділігін арттырып, тұрғындарды жеке машинадан бас тартуға ынталандыру қажет, метро желісін жалғасты кеңейту керек.
«Мектеп және балабақшаға баратын қатынас мәселесін шешу керек, өйткені бұл қарбалас мезгілде көлік кептелісін ауырлатады. Жол-көлік саласындағы мәселелерді анықтау және шешу үшін тұрғындар мен тәуелсіз сарапшылардан кеңес алған жөн», — деді Тоқаев.
Сондай-ақ ол кептелісте сағаттап тұру азаматтардың көңіл күйі мен денсаулығына кері әсер етіп қана қоймай, қала экономикасы мен экологиясына ауыр зиян тигізетінін айтты. Мәселені шешу үшін әкімдік қозғалысты тиімді ұйымдастырып, заманауи цифрлы технологиялар мен жол қозғалысын басқарудың интеллектуалды жүйесін енгізуге тиіс.
Мемлекет басшысы халықтың жол жүру және көлік жүргізу мәдениетін көтеру үшін полиция азаматтық қоғамның әлеуетін толық пайдалануы қажет екенін айтты.
Бұған дейін Тоқаев Алматыдағы трамвайдан бас тарту туралы шешім асығыс қабылданғанын айтқан.
Комментариев: 0