Porsche Cayenne электрлі болғанмен, V8-ді сақтап қалады

Porsche тек электр күшімен жүретін жаңа Cayenne-нің суретін жариялады. Әзірше ол қалың камуфляжбен жабылған. Марка екі буынды қатар сатады.

Porsche батареялы Cayenne жобасы жасалып, процесс қазір кезеңдердің ең маңыздысына келді деп хабарлады. Виртуал кеңістікте, зертханада және полигонда көптеген тәжірибе жүргізген соң прототиптер жолда сынақтан өте бастады.

Болжам бойынша электрокар бұған дейін Volkswagen Porsche Macan EV-ге, Audi бірнеше моделіне қолданған PPE платформасына негізделеді. Бірақ ірі Porsche үшін шеберлер платформаны өзгертеді. Төртінші буын өкілін бренд қашан ресми таныстыратыны белгісіз, десе де Porsche басшысы Оливер Блюме электрокар онжылдықтың ортасында шығады деді. Оған дейін батареялы прототиптер мыңдаған шақырым жолды жүріп өтеді.

Қазіргі Cayenne біраз уақыт бұрын едәуір жаңарған, компания сол кезде модельдің жаңа буынын жасағандай күш салдық деп мәлімдеді. Жұмсалған күш пен уақыт оның өмірін онжылдықтың аяғына дейін ұзартуға мүмкіндік береді. Алайда бензинді моторлар қосымша модернизациядан өтетін сияқты. Компанияның есебіне сүйенсек, 2030 жылға дейін Cayenne топтамасы классикалық моторлармен қатар гибрид және электрлі күштік құрылымдардан тұрады.

Электромобиль нарығы тұралап қалғандықтан, Porsche даму стратегиясын өзгертуге мәжбүр болды. Бұрын 2030 жылға қарай топтамасының 80 %-ын электрлі етуді көздесе, қазір дәстүрлі мотордан толық бас тартқысы келмейтінін аңғартты. Мәселен, электрлі Panamera-ның шығуы оның гибрид не бензинді нұсқасы болмайды дегенді білдірмейді. Алайда отынмен жүретін Macan мен 718 көп ұзамай конвейерді босатады.