Атақты eBay порталы 1990 жылы шыққан Mazda 323F-ті саудаға қойды. Сатушылар небәрі 630 шақырым жол жүрген, ешқашан есепке қойылмаған машина үшін 17 950 еуро (9.3 млн теңге) сұрап отыр.
Автомобильді Жапониядан Еуропаға Швейцарияның Heinz Macchi дилерлік компаниясы жеткізген. Mazda 323F дер кезінде өтпей, дилер қоймасында тұрып қалыпты. Бұл жағдайға автосалон иесінің әйелі мен ұлының өлімі себеп болған деген расталмаған ақпарат бар.
Машина қазір Польшаның Краков қаласында тұр, бірақ ол жерге қалай жеткені белгісіз. Mazda 323F бес сатылы механика қораппен жұптасатын 103 ат күшіне ие 1.8 литрлік мотормен жүреді. Сатушы хетчбэктің жағдайы мінсіз екенін айтты — қозғалтқышы істеп тұр, тот басқан жері жоқ, бояуы кетпеген, салоны тозбаған. Сондай-ақ 323F қосымша рөлді гидрокүшейткіш және төбедегі люкпен жабдықталған.
Хетчбэк ешқашан есепке қойылмаған, оны сатып алған адам шыққанына 34 жыл болған машинаның алғашқы иесі атанады.
Комментариев: 0