Lada Priora жүргізушісінің басбұзарлығы туралы видео «Qumash» Telegram арнасында жарияланды. Танысына сенген жүргізуші қасақана жолдың қарсы бағытымен жүрген. Бейнежазба Отырар ауданының орталығы — Шәуілдер ауылында түсірілгені белгілі болды.
Рөлдегі адам достарына «ерлігін» көрсету үшін полиция көлігіне бетпе-бет келіп тоқтайды. Патрульдің бірі бұларға жақындап, құжат талап етеді. Ал «Приора» жүргізушісі ешқандай құжаттың жоқтығын айтып, «Жұмабекке қоңырау шалуды» сұрайды. Осыдан кейін полицейлер жол ережесін өрескел бұзғанына қарамастан оны жібере салады.
Түркістан облысы ПД баспасөз қызметі автокөлік жүргізушісінің табылғанын мәлімдеді. 1996 жылы туған Шымкент қаласының тұрғынына бірден екі хаттама толтырылды: «көлік құралын жолдың жүру бөлігінде орналастыру, қарсы жүріп өту немесе басып озу қағидаларын бұзу» және «Полиция қызметкерлерінің талаптарын орындамау және алкогольдік, есірткілік мас күйін куәландырудан жалтару». Жол ережесін бұзғанды мақтан көретін жігіт кешірім сұрады, машинасы айыптұрағына жіберілді. Ал оны жібере салған тәртіп сақшыларына қатысты Отырар аудандық полиция басқармасы қызметтік тексеріс жүргізіп жатыр.
Кейін «Приора» жүргізушісі сенген Жұмабектің кім екені анықталды. Ол — Отырар аудандық полиция бөлімінің Әкімшілік полиция бөлімшесінің бастығы Жұмабек Төлеген екен. Оған қатысты Түркістан облысы ПД ішкі қауіпсіздік басқармасы қызметтік тексеріс жүргізеді.
Комментариев: 0