Павлодарда жол жөндеу жұмысы басталады

Павлодарда биыл қала көшелері 11 наурыздан бастап жөнделеді. Қала әкімі Асайын Байханов Instagram парақшасында хабарлағандай, бұрын жолдың бүлінген бөлігін қалпына келтіру үшін күн жылынғанын күту керек болатын, жұмыс екі кезеңнен тұрады: қыс аяғында шұңқырларға қиыршық тас төселіп, күн жылынған соң және асфальт-бетон зауыттары іске қосылғаннан кейін шұңқырларға қарапайым асфальт жатқызылатын.

«Биыл қала көшелерінде алғаш рет полимерлі суық асфальт төсеу технологиясы — МАС-асфальт (multigrade asphalt cement) қолданылады, оны нөлден төмен температурада пайдалануға рұқсат етіледі. Суық полимерлі асфальт төселгеннен кейін оның кепкенін күтпей-ақ көліктер жүре берсе болады», — деп жазды әкім.

Павлодарда жалпы аумағы 3200 шаршы метрден асатын 39 көше жөнделеді.

Айта кетейік, МАC технологиясы бүкіл әлемде бұрынан бері қолданылып жүр. Оның ерекшелігі, асфальтты араластырған кезде арнайы полимер ұнтағы қосылады, мұндай материалды –15-тен +40 °C-қа дейінгі температурада төсеуге болады.

Қазіргі таңда суық асфальт қарапайым қаппен де сатылады. Бірақ ол әдеттегі түрінен әлдеқайда қымбат.