Павлодар — РФ шекарасы (Омбы) тас жолы ақылы болады

Көлік министрінің бұйрығы 3 қазанда жарияланды, ол 14 қазанда күшіне енеді. Құжатқа сәйкес 1 б санатындағы Павлодар — РФ шекарасы (Омбы) және 2-санаттағы РФ шекарасы (Омбы) — Қытай шекарасы (Майқапшағай) тас жолымен жүріп өткен жүк көлігі мен автобус жүргізушілерінен ақша сұралады. Олар аталған бөлікпен (198.21 км) жүргені үшін төмендегідей сома төлейді:

• орын саны 16-дан аспайтын автобустар және 2.5 тоннаға дейін жүк көтеретін көліктер — 0.2873 АЕК (991.185 теңге);
• орын саны 32-ден аспайтын автобустар және 5.5 тоннаға дейін жүк көтеретін көліктер — 0.5744 АЕК (1 981.68 теңге);
• орын саны 32-ден көп автобустар және 10 тоннаға дейін жүк көтеретін көліктер — 0.852 АЕК (2 939.4 теңге);
• 10 тоннадан 15 тоннаға дейін жүк көтеретін көліктер —1.1491 АЕК (3 964.395 теңге);

тіркемесі бар жүк көліктері мен ершікті тартқыштарды қоса алғанда, 15 тоннадан ауыр жүк көтеретін машиналар — 1.4361 АЕК (4 954.545 теңге).

Жол ақысы онлайн төленеді. Трассада шлагбаум болмайды.

Іргелес ауылдарда тұратын азаматтар бағасы 1-5 АЕК (2023 жылы 3450-17250 теңге) шамасында болатын айлық абонемент немесе 12-60 АЕК (41 400-207 000 теңге) тұратын жылдық абонемент сатып алса болады.

Жүргізушілер Ертіс өзені арқылы өтетін көпірді, республикалық маңызы бар Ленинский — Ертіс — Русская Поляна тас жолын тегін балама ретінде қолдана алады.