Қазіргі Рим папасы Франциск сән-салтанатты жаны сүймейтін адам. Сондықтан қымбат көліктерге де мүлде қызықпайды. Дегенмен автоөндірушілер оған арнап көлік жасауға құмар. Бұл әрине танымал тұлғаның қамы үшін емес, өздеріне жарнама жасап, кәсібін дөңгелету үшін істелетін әрекет. Соңғы рет Toyota сутекті Mirai моделін ұсынған.
Бұл жолы Хенрик Фискер есімді саудагер Ватиканға барып, Папаның гаражын Fisker Ocean-мен толықтыру жөнінде келісімге қол жеткізді. Фискер жариялаған көлік нобайында оның төбесінде мөлдір әйнектен жасалған қалпақ бар. Бұл понтификтің сапарда тік тұрып жұртпен амандасуына мүмкіндік береді.
Машина өндірісі 2022 жылы күзде басталады. Францискпен келіссөз жүргізгенде кәсіпкер көліктің экологияға зияны жоқ екенін баса айтқан болар. Ал қарапайым клиенттерді темір тұлпар жылдамдық, жайлылық, аса сәнді дизайн сынды қасиеттерімен тартады. Бағасы 38 мың доллардан басталатын модельге қазірдің өзінде 16 мың адам тапсырыс берген.
Комментариев: 0