Қазақстанда 2015 жылдан бері жұмыс істеп келе жатқан жеңілдікті автонесие бағдарламасы жиі сынға ұшырайды. Көпшілік бағдарлама кезегі әділ жүретініне сенбейді. Билік кеш те болса сыннан сабақ алып, несие беру процесін түбегейлі өзгертуге бел буды.
2023 жылы 6 ақпан сағат 10:00-де autonesie.kz онлайн-платформасы іске қосылып, пайызы төмен автонесие алғысы келген азаматтардың тізімі жасалады. Пулға кіру үшін клиент электронды цифрлы қолтаңбасын (ЭЦҚ) дайындап, қай автозауыттың өнімін алатынын алдын ала шешіп алуы қажет. Яғни, тұрғын Hyundai мінгісі келсе Hyundai Trans Kazakhstan зауытын, ал басқа машина алғысы келсе (Kia, JAC, Chevrolet) «СарыарқаАвтоПромды» көрсетуі керек.
Өтініш қабылданғаннан кейін клиент автосалонға барып, сонда бар автомобильді таңдайды немесе алдағы 60 күнде келетін көлікті күтеді. Екі айдан артық күтуге мүмкіндік жоқ, өйткені өтініш расталған сәттен бастап жеңілдікпен көлік сатып алуға 60 күн ғана уақыт беріледі.
Тізімге ену автонесие алдың деген сөз емес. Клиент дилерден машина таңдап, төлем шотын алғаннан кейін бағдарламаға қатысып жатқан банктердің біріне хабарласып, төлем қабілетін тексертеді. Банк несиені мақұлдаса сатып алушыға кепілхат береді, оны автосалонға апарған соң ғана жұмыс аяқтайды.
Несие шарттары:
- сыйақы мөлшерлемесі — 4 %
- несие сомасы — 10 миллион теңгеден аспайды
- мерзімі — 7 жылдан аспайды
- бастапқы төлем — 0 %
- көлік құны — 15 миллион теңгеден аспайды (қарыз алушы 10 миллионын ғана несиемен, қалғанын өзі төлейді).
Бұл жолы жүйеде жиналған 7.6 млрд теңге беріледі. Максимум 760 адам өтініш бере алады, одан кейін өтініш қабылдау тоқтайды. Бағдарлама авторлары алда ай сайын жүздеген несие беруді жоспарлап отыр.
Өтініш берген алғашқы 760 адамның біреуі банктен рұқсат ала алмаса немесе 60 күнде автомобиль таңдап үлгермесе, берілген қаражат пулға қайтып, келер айда қайта бөлінеді.
Өтініш беруші осы бағдарлама бойынша автонесие алған болса, платформада сол адамның бұған дейін берген өтініші бар болса және қаражат таусылса өтініш қабылданбайды.
«Өнеркәсіпті дамыту қоры» АҚ ресми YouTube-арнасында өтініш беру барысын қазақ және орыс тілінде түсіндірген видео жариялады.
Комментариев: 0