Өзбекстанда соңғы Lacetti конвейерден түсті

Lacetti 2002 жылы Оңтүстік Кореяда жарық көрген. Көп өтпей, 2003 жылдан бастап модель Өзбекстанда шыға бастады. 2013 жылы автомобильдің сырт пішіні жаңарып, жаңа мотор және автомат қораппен жабдықталып, атауы Chevrolet Gentra (Қазақстанда — Daewoo Gentra, кейін — Ravon Gentra) деп өзгерді. Былтыр Өзбекстанда модель қайтадан Lacetti деп аталды.

Қазақстандағы «АЗИЯ АВТО» зауыты «Лачеттиді» 2007 жылдан бастап ірі торапты әдіспен құрастырды. Өзбекстанда седан ғана шықса, Өскеменде хетчбэк те жасалған. Модель Қазақстанда 2011 жылы Оңтүстік Кореядағы өндірісі тоқтағанға дейін шықты. Ал Өзбекстан Lacetti-ді тағы 13 жыл өндірді.

Седанның шанақ дизайнын 2002 жылы италиялық Pininfarina ательесі, ал хетчбэкті 2004 жылы Джуджароның Italdesign компаниясы жасаған. Төрт есікті нұсқаның дизайны жарасымды болды, ғасыр басында жарық көрген Lacetti әлі күнге дейін әдемі көрінеді.

Өзбекстандық «гибрид» 2013 жылы Gentra деп аталды. Седан мен хетчтің екі түрлі шанақ стилі модель саудасына кері әсер еткен жоқ. Керісінше сатылым мөлшері тұрақты түрде артып отырды.

Модель Қазақстан нарығында да жақсы өтті. Бірнеше жыл үзілістен кейін 2015–2016 жылдары Өзбекстанда шыққан, автомат қорабы бар әрі жақсы жабдықталған «Джентра» біздің елде 4.5 млн теңгеден саудаланды.

Қазақстанда модель саудасы 2018 жылдан кейін тағы тоқтады. Lacetti автосалонға қайта оралады деп ешкім күтпеген, бірақ былтыр маусымда Қазақстан нарығына қайта аяқ басты. Бұл жолы модельді Қостанайдағы зауыт Өзбекстаннан келетін автокомплектіден құрастыра бастады. Бірақ жалғыз комплектацияда 8 млн теңге бағамен елде бестселлер атана алмайтыны анық еді, жұрт одан гөрі «кобальт» алғанды жөн көреді.

Өзбекстанда Lacetti әрі Gentra-ға сұраныс төмендеген емес, кейінгі жылдары тек қара түсті нұсқасы танымал бола түсті. Avtoelon.uz жергілікті эстрада бұл модельге ән арнағанын хабарлады.

Өзбекстанда қанша Chevrolet Lacetti шыққан?

22 жылдың толық статистикасы жоқ, бірақ 2013 жылғы рестайлингтен бері Асакада 487 104 машина жарық көргені белгілі. Автозауыт 2023 жылдың өзінде 89 565 автомобиль конвейерге тұрғанын хабарлады, ал оған дейін жылына орта есеппен 11 222 машина жасалатын. Өзбекстанда былтыр ең көп шыққан модельдер тізімінде Lacetti үшінші орын алды.

Көрші елдегі автоөнеркәсіптің рекордсмені саналатын Nexia-ның 20 жылда (1996-2016 жылдары) 1 060 710 данасы сатылыпты.

Өзбекстандағы автоөндіріс туралы Олжас Оқас YouTube-тегі QAZ Kolesa.kz арнасында бейнерепортаж жасаған.