Өзбекстанда ескі автомобиль иелері экоалым төлейді

Өзбекстан билігі автопаркті жаңарту мақсатында қатаң шаралар қабылдауға ниетті. Avtoelon хабарлағандай, Ұлттық экология комитеті 2027 жылдан бастап шыққанына 30 жылдан асқан автомобиль үшін арнайы экологиялық алым енгізуді ұсынып отыр. Бұл алымды жыл сайын төлеуге тура келеді, мөлшері — 30 базалық есептік шама (12.4 млн сум немесе 523 мың теңге).

Сондай-ақ шенділер экологиялық класы төмен машинаны пайдалану мен қайта тіркеуді қиындататын қатаң ұсыныстар дайындап жатыр. Ұсынысқа сәйкес, белгіленген эколонормаға сай келмейтін автомобиль утилизацияға жіберіліп, иесіне ақшалай өтемақы немесе жаңа көлік сатып алғанда алғашқы жарна ретінде пайдалануға болатын арнайы ваучер беріледі.

Билік бұл жүйені кезең-кезеңмен енгізуді жоспарлап отыр. Ереже алдымен жеңіл автомобильдерді, кейін жүк көлігі мен автобустарды қамтиды. Ал 2030 жылға қарай барлық дөңгелекті көлік құралы осы жүйеге бағынады.

Автопаркті жаңарту бойынша мұндай схеманы енгізу немесе енгізбеу мәселесін қоғам шешеді. Қазір халық дауыс беріп жатыр және басылымдар хабарлағандай, әзірге дауыс берушілердің басым бөлігі заң жобасын әзірлеушілерді қолдап отырған жоқ.