Өскеменде жаңа трамвайлар жолға шықты

Алматыдағы трамвайлар жұмысын тоқтатқан соң елде мұндай көлік қолданатын үш-ақ қала қалды. Қазір Павлодар мен Өскеменде ол муниципалдық меншікте, Теміртауда бұл іспен металлургия мекемесінің көлік басқармасы айналысады. Олардың бюджетін елорда мен ең ірі мегаполис қазынасындағы қаражатпен салыстыруға келмейді, дегенмен трамвай желісі жұмыс істеп қана қоймай, жаңарып жатыр.

2017 жылдан бері Павлодар «Белкоммунмаш» зауыты шығарған 23 дана АКСМ-802Е трамвайын сатып алды.

Биыл қаңтар басында су жаңа төрт трамвай (АКСМ-62103) Өскемен көшелеріне шықты. Шаһар билігі трамвайларын жаңартып, рельс жолдарын ауыстырып жатыр. Әкімнің айтуынша жаңа вагондардың жұмысын талдағаннан кейін әрі қарай сатып алуға қатысты шешім қабылданады.

1 / 3

• 
• 
• 

1 / 3

Қала басшысы трамвай паркінің 2018 жылы муниципалдық меншікке өтуі жақсы нәтиже бергенін атап өтті. Жеке қолда болғанда қарызға белшеден батып, құрдымға кетудің аз-ақ алдында қалған екен. Кезінде Алматыда жүрген ескі вагондарды Өскемен алғаны Қазақстандағы жеңіл рельсті көлік тарихынан хабары бар тұрғындардың есінде болар. Ол кезде мегаполис билігі бұзыла беретін көлікке ақша құйғысы келмеді. Ал 2022 жылы қайта-қайта істен шығатын көне трамвайдың бір дөңгелегі жол үстінде түсіп қалды.

Әдетте өз қатесін көрсету үшін шенділер басқа елдің тәжірибесіне сүйенеді. Бірақ Алматыдағы трамвай тағдырын сөз еткенде алысқа барудың қажеті болған жоқ.