19 мамырда Сәтбаев даңғылымен жүйткіп бара жатқан Lexus IS «Қорғау-Сергек» камерасы арқылы патрульдік экипаждың көзіне түсті. Облыстық полиция департаменті көк седанға жалпы сомасы 2 млн 287 мың теңге болатын 46 айыппұл рәсімделгенін мәлімдеді.
Сол күні бақылау камераларын қарап шыққан тәртіп сақшылары нөмірін алып тастаған көлікті жергілікті аудандардың бірінде үй ауласынан тапқан. Полицейлер жиырма тоғыз жастағы көлік иесін тұтқындап, оның жалған нөмір таққан көлікті тізгіндегенін анықтады.
Жүргізуші Әкімшілік кодекстің 590-бабы 2, 3 және 4-тармақтары (мемлекеттік нөмірсіз көлік жүргізу, жалған нөмір орнату және көлікті жалған нөмірмен айдау) бойынша жауапқа тартылды. Бұдан бөлек қылмыскер 15 АЕК (51 750 теңге) айыппұл төлеуі, 5 тәулікке дейін қамалуы, бір жылға көлік жүргізу құқығынан айырылуы мүмкін. Қылмыстық істің материалдары сотқа жолданды. Қазір Lexus IS айыптұрақта тұр.
Комментариев: 0