ШҚО бас санитар дәрігерінің орынбасары Гулиям Тагаева карантинді қатаңдату туралы қаулыға қол қойды. Құжат мәтініне сай, 1 қарашадан бастап азаматтардың облыс аумағы мен Өскемен қаласына кіріп-шығуы қиындайды. Бірақ облыс тұрғындарының бір ауданнан екіншісіне қатынауына рұқсат берілді, олар тек облыс орталығына бара алмайды. Тәртіпті қадағалау үшін ШҚО аумағына 13 блокбекет қойылады.
Шлагбаум арқылы тек медицина мамандары, халықты аса қажет тауарлармен қамтитын ұйым қызметкерлері, ем алуы тиіс азаматтар, транзиттік жолаушылар мен жүк тасушылар, тұрғылықты мекенжайына қайтатын тұрғындар, күзгі жиын-терімге, ветеринарлық, ауылшаруашылық шараларға тартылған азаматтар және жол жөндеу, апаттық қызмет мамандары мен облыста тұратын, бірақ орталықта жұмыс істейтін (анықтамасы болса) адамдар өте алады.
Жекелеген азаматтардың да арнайы рұқсатпен өтуіне мүмкіндік бар. Оларға рұқсатқағазды жергілікті атқару органдары береді.
Біраз уақыт бұрын өңірдегі Тауар мен қызмет сапасы мен қауіпсіздігін қадағалау департаменті басшысының міндетін атқарушы Талғат Тұңғышбаев тұрғындар санитария нормаларын сақтамағандықтан және шетелден жолаушылар мен түрлі жүк толассыз келіп жатқандықтан вирус жұқтырғандар саны артқанын хабарлады. Сол себепті Шығыс Қазақстан облысына кірер жолды жабу жөнінде шешім қабылданды.
Комментариев: 0